Page Text
________________
प्रश्नव्याकरण सुत्तं
अणुत्तरा दुविहा कप्पाईया विमाणवासी महिड्ढिया उत्तमा सुरवरा, एवं च ते चव्विहा सपरिसा वि देवा ममायंति भवण-वाहण जाणविमाण-सयणासणाणि य णाणाविह वत्थभूसणाण य पवरपहरणाणि य णाणामणिपंचवण्णादिव्वं य भायणविहिं णाणाविह कामरूव - वेउव्वियअच्छर गणसंघाए, दीव-समुद्दे, दिसाओ विदिसाओ चेइयाणि वणसंडे, पव्वए य गामणयराणि य आरामुज्जाणकाणणाणि य कूव-सर-तलाग वावि-दीहिय-देवकुल-सभप्पव-वसहिमाइयाइं बहु कित्तणाणि य परिगिण्हित्ता परिग्गहं विउल दव्वसारं देवावि सइंदगा ण तित्तिं ण तुट्ठि उवलति I अच्चंत-विउल लोहाभिभूयसण्णा वासहर - इक्खुगार वट्ट पव्वय-कुंडल-रुयगवरमाणुसोत्तर- कालोदहि-लवण-सलिल-दहपइ-रड्कर - अंजणक-सेल- दहिमुह-ओवाउप्पाय-कंचणकचित्त-विचित्त-जमगवर - सिहरिकूडवासी ।
वक्खार-सुविभत्तभागदेसासु अकम्मभूमिसु कम्मभूमिसु जे वि य णरा चाउरंतचक्कवट्टी वासुदेवा बलदेवा मंडलीया इस्सरा तलवरा सेणावई इब्भा सेट्ठी रट्ठिया पुरोहिया कुमारा दंडणायगा माडंबिया सत्थवाहा कोडुंबिया अमच्चा एए अण्णे य एवमाई परिग्गहं संचिणंति अणंतं असरणं दुरंतं अधुवमणिच्चं असासयं पावकम्मणेम्मं अवकिरियव्वं विणासमूलं वहबंधपरिकिलेसबहुलं अणंतसंकिलेस कारणं, ते तं धणकणगरयणणिचयं पिंडिया चेव लोहघत्था संसारं अइवयंति सव्वदुक्खसण्णिलयणं ।
परिग्गहस्स य अट्ठाए सिप्पसयं सिक्खए बहुजणो कलाओ य बावत्तरिं सुणिउणाओ लेहाइयाओ सउणरुयावसाणाओ गणियप्पहाणाओ, चउसट्ठि च महिलागुणे रइजणणे, सिप्पसेवं, असि-मसिकिसि-वाणिज्जं, ववहारं अत्थसत्थई- सत्थच्छरुप्पगयं, विविहाओ य जोगजुंजणाओ अण्णेसु एवमाइएसु बहुसु कारण- सएसु जावज्जीवं णडिज्जए संचिणंति मंदबुद्धी ।
परिग्गहस्सेव य अट्ठाए करंति पाणाण वहकरणं, अलिय णियडिसाइसंपओगे- परदव्वाभिज्जा सपरदार अभिगमणासेवणाए आयासविसूरणं कलहभंडणवेराणि य अवमाणणविमाणणाओ इच्छमहिच्छप्पिवाससययंतिसिया तण्हगेहिलोहघत्था अत्ताणा अणिग्गहिया करेंति
कोहमाणमायालोहे |
अकित्तणिज्जे परिग्गहे चेव होंति णियमा सल्ला दंडा य गारवा य कसाया सण्णा य कामगुणअण्हगा व इंदियलेस्साओ सयणसंपओगा सचित्ताचित्तमीसगाई दव्वाइं अणंतगाई इच्छंति परिघेत्तुं ।
सदेवमणुयासुरम्मि लोए लोहपरिग्गहो जिणवरेहिं भणिओ, णत्थि एरिसो पासो पडिबंधो अत्थि सव्वजीवाणं सव्वलोए ।
अर्थानामर्जने दुक्खं, अर्जिताम् च रक्षणे ।
आये दुक्खं व्यये दुक्खं धिक् ! अहो दुक्खभाजनम् ॥
9 परलोगम्मि य णट्ठा तमं पविट्ठा महयामोहमोहियमई तिमिसंधयारे तसथावरसुहुम बायरेसु पज्जत्तमपज्जत्तग-साहारण-पत्तेयसरीरेसु य अण्डय-पोयय-जराउय-रसय-संसेइम-सम्मुच्छिम उब्भिय-उववाइसु य णरय - तिरिय-देव- मणुस्सेसु जरामरणरोगसोगबहुलेसु पलिओवमसागरोवमाइं अणाइयं अणवयग्गं दीहमद्धं चाउरंतसंसारकंतारं अणुपरियट्टंति जीवा लोहवस सण्णिविट्ठा ।
22
| SR No. | 009910 |
| Book Title | Agam 10 Ang 10 Prashna Vyakaran Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 45 |
| Language | Prakrit |
| Classification | Book_Devnagari, Agam, Canon, & agam_prashnavyakaran |
| File Size | 3 MB |