________________
२९
अणुत्तरोववाइ सुत्त
एवं
खलु अहं इमेणं उरालेणं तवोकम्मेण किसे धमणिसंतए जाए एवं जहा खंदओ तहेव चिंता । आपुच्छणं । थेरेहिं सद्धिं विउलं पव्वयं दुरूहइ । मासिया संलेहणा । णवमासा परियाओ जाव कालेमासे कालं किच्चा उड्ढं चंदिम सूर-गहगण - णक्खत्त-तारारूवाणं जाव णवगेवेज्जे विमाण पत्थडे उड्ढं दूरं वीईवइत्ता सव्वट्ठसिद्धे विमाणे देवत्ताए उववण्णे । थेरा तहेव ओयरंति जाव इमे से आयारभंड |
भंते ! त्ति भगवं गोयमे तहेव आपुच्छइ जहा खंदयस्स । भगवं वागरेइ जाव सव्वट्ठसिद्धे विमाणे उववण्णे |
धणस्स णं भंते! देवस्स केवइयं कालं ठिई पण्णत्ता ?
गोयमा ! तेत्तीस सागरोवमाइं ठिई पण्णत्ता ।
से णं भंते! ताओ देवलोगाओ कहिं गच्छिहिइ ? कहिं उववज्जिहिइ ?
गोयमा ! महाविदेहे वासे सिज्झिहिइ ।
॥ पढमं अज्झयणं समत्तं ॥
तइओ वग्गो २-१० अज्झयणाणि
सुक्खादि
उक्खेवओ बिइयस्स ।
एवं खलु जंबू ! तेणं कालेणं तेणं समएणं काकंदी णयरी । जियसत्तू राया । तत्थणं काकंदीए णयरीए भद्दा णामं सत्थवाही परिवसइ, अड्ढा जाव अपरिभूया । तीसे णं भद्दा सत्थवाहीए पुत्ते सुणक्खत्ते णामं दारए होत्था अहीण पंचिंदिय जाव सुरूवे । पंचधाइपरिक्खित्ते, जहा धण्णो तहा जाव उप्पिं पासायवरगए जाव पच्चणुभवमाणा विहरइ |
ते काणं तेणं समएणं समणस्स भगवओ महावीरस्स समोसरणं । जहा धण्णो तहा सुणक्खत्तो वि णिग्गओ । जहा थावच्चापुत्तस्स तहा सुणक्खत्तस्स णिक्खमणं जाव अणगारे जाए ईरियासमिए जाव बंभयारी ।
तए णं से सुणक्खत्ते अणगारे जं चेव दिवस समणस्स भगवओ महावीरस्स अंतिए मुंडे भवित्ता अगाराओ अणगारियं पव्वइए तं चेव दिवसं, एवं जहेव धण्णो तहेव अभिग्गहं अभिगिण्हइ जाव बिलमिवपण्णग भूएणं अप्पाणेणं आहारं आहारेइ, आहारेत्ता संजमेणं तवसा अप्पाणं भावेमाणे विहरइ । सामी बहिया जणवय - विहारं विहरइ । एक्कारस अंगाई अहिज्जइ जाव संजमेणं तवसा अप्पाणं भावेमाणे विहरइ । तए णं से सुणक्खत्ते अणगारे तेणं उरालेणं जाव जहा खंदओ ।
14
