________________
उपासकदसांग सूत्र
| छ
पण्णत्ते, सत्तमस्स णं भंते ! अंगस्स उवासगदसाणं समणेणं जाव संपत्तेणं के अटे पण्णत्ते ? एवं खलु जंबू ! समणेणं भगवया महावीरेणं जाव संपत्तेणं सत्तमस्स अंगस्स उवासगदसाणं दस अज्झयणा पण्णत्ता । तं जहाआणंदे कामदेवे य, गाहावइ चुलणीपिया । सुरादेवे चुल्लसयए, गाहावइ कुंडकोलिए | सद्दालपुत्ते महासयए, णंदिणीपिया सालिहीपिया || जइ णं भंते ! समणेणं जाव संपत्तेणं सत्तमस्स अंगस्स उवासगदसाणं दस अज्झयणा पण्णत्ता, पढमस्स णं भंते ! अज्झयणस्स समणेणं जाव संपत्तेणं के अटे पण्णत्ते ? एवं खलु जंबू ! तेणं कालेणं तेणं समएणं वाणियगामे णामं णयरे होत्था । वण्णओ । तस्स वाणियगामस्स बहिया उत्तरपरत्थिमे दिसिभाए दइपलासए णामं चेहए | वण्णओ। तत्थ णं वाणियगामे णयरे जियसत्तू राया होत्था | वण्णओ। तत्थ णं वाणियगामे आणंदे णामं गाहावई परिवसइ-अड़ढे दित्ते, वित्ते विच्छिण्ण-विउल-भवण-सयणासण-जाण-वाहणे, बहु-धण-जायरूव-रयए, आओग-पओग-संपउत्ते, विच्छड्डिय- पउर-भत्त-पाणे, बहु-दासीदास-गो-महिस-गवेलगप्पभूए बहुजणस्स अपरिभूए | तस्स णं आणंदस्स गाहावइस्स चत्तारि हिरण्णकोडीओ णिहाणपउत्ताओ, चत्तारि हिरणकोडीओ इढिपउत्ताओ; चत्तारि हिरण्णकोडीओ पवित्थरपउत्ताओ, चत्तारि वया दसगोसाहस्सिएणं वएणं होत्था । से णं आणंदे गाहावई बहूणं राईसर तलवर-माइंबिय-कोडुबिय-इब्भ-सेट्ठि- सेणावइ सत्थवाहाणं बहुसु कज्जेसु य कारणेसु य मंतेसु य कुटुंबेसु य गुज्झेसु य रहस्सेसु य णिच्छएसु य ववहारेसु य आपुच्छणिज्जे पडिपुच्छणिज्जे सयस्स वि य णं कुटुंबस्स मेढीभूए, पमाणभूए, आहारभूए, आलंबणभूए, चक्खुभूए सव्व-कज्ज-वड्ढावए यावि होत्था । तस्स णं आणंदस्स गाहावइस्स सिवाणंदा णामं भारिया होत्था- अहीण पडिपुण्ण- पंचिंदियसरीरा, लक्खण-वंजण-गुणोववेया, माणुम्माणप्पमाण-पडिपुण्ण- सुजाय- सव्वंगसुंदरंगी, ससि-सोमाकार-कंत-पिय-दंसणा सुरूवा | आणंदस्स गाहावइस्स इट्ठा, आणंदेणं गाहावइणा सद्धिं अणुरत्ता, अविरत्ता इढे सद्द-फरिस-रस-रूव-गंधे पंचविहे माणुस्सए कामभोए पच्चणुभवमाणी विहरइ । तस्स णं वाणियगामस्स णयरस्स बहिया उत्तरपुरत्थिमे दिसीभाए एत्थ णं कोल्लाए णामं सण्णिवेसे होत्था। रिद्धिस्थिमिय-समिद्धे जाव पासाईए, दरिसणिज्जे, अभिरूवे, पडिरूवे |
१०
