________________
ज्ञाताधर्मकथा
एवामेव समणाउसो ! जे णिग्गंथे वा णिग्गंथी वा ओसण्णे जाव संथारए पमत्ते विहरड़, से णं इहलोए चेव बहूणं समणाणं बहूणं समणीणं बहूणं सावयाणं बहूणं सावियाणं हीलणिज्जे जाव अणुपरियट्ठइ ।
तए णं ते पंथगवज्जा पंच अणगारसया इमीसे कहाए लद्धट्ठा समाणा अण्णमण्णं सद्दावेति, सद्दावित्ता एवं वयासी- सेलए रायरिसी पंथएणं अणगारेणं सद्धिं बहिया जाव विहरइ, तं सेयं खलु, देवाणुप्पिया! अम्हं सेलयं रायरिसिं उवसंपज्जित्ताणं विहरित्तए, एवं संपेहेंति, संपेहित्ता सेलयं रायरिसिं उवसंपज्जित्ता णं विहरंति ।
तए णं ते सेलए रायरिसी पंथगपामोक्खा पंच अणगारसया जेणेव पोंडरीए पव्वए तेणेव उवागच्छंति, एवं जहेव थावच्चापत्ते तहेव सिद्धा |
एवामेव समणाउसो ! जो णिग्गंथो वा णिग्गंथी वा जाव संसारकंताणं वीईवइस्सइ ।
एवं खलु जंबू ! समणेणं भगवया महावीरेणं पंचमस्स णायज्झयणस्स अयमढे पण्णत्ते त्ति बेमि॥
॥ पंचमं अज्झयणं समत्त |
छठं अज्झयणं
जइ णं भंते ! समणेणं भगवया महावीरेणं पंचमस्स णायज्झणस्स अयमढे, पण्णत्ते, छट्ठस्स णं भंते ! णायज्झयणस्स के अढे पण्णत्ते ?
एवं खलु जंबू ! तेणं कालेणं तेणं समएणं रायगिहे समोसरणं | परिसा णिग्गया ।
तेणं कालेणं तेणं समएणं समणस्स भगवओ महावीरस्स जेट्टे अंतेवासी इंदभूई णामं अणगारे समणस्स भगवओ महावीरस्स अदूरसामंते जाव सुक्कज्झाणोवगए विहरइ । तए णं से इंदभूई णामं अणगारे जायसड्ढे जाव एवं वयासी- कहं णं भंते ! जीवा गरुयत्तं वा लयत्तं वा हव्वमागच्छंति ?
