________________
ज्ञाताधर्मकथा
णच्चासण्णे गाइदूरे सुस्सूसमाणे णमंसमाणे अभिमुहं पंजलिउडे विणएणं पज्जुवासमाणे एवं वयासी
जइ णं भंते ! समणेणं भगवया महावीरेणं आइगरेणं जाव सासयं ठाणमवगएणं, पंचमस्स अंगस्स अयमढे पण्णत्ते, छट्ठस्स णं भंते ! अंगस्स णायाधम्मकहाणं के अढे पण्णत्ते ? जंबु त्ति, अज्जसुहम्मे थेरे अज्जजंबूणामं अणगारं एवं वयासी- एवं खलु जंबू ! समणेणं भगवया महावीरेणं आइगरेणं जाव ठाणं संपत्तेणं छट्ठस्स अंगस्स दो सुयक्खंधा पण्णत्ता, तंजहा- णायाणि य धम्मकहाओ य ।
w
जइ णं भंते ! समणेणं भगवया महावीरेणं आइगरेणं जाव ठाणं संपत्तेणं छट्ठस्स अंगस्स दो सयक्खंधा पण्णत्ता, तंजहा- णायाणि य, धम्मकहाओ य; पढमस्स णं भंते ! सुयक्खंधस्स समणेणं भगवया महावीरेणं जाव ठाणं संपत्तेणं णायाणं कई अज्झयणा पण्णत्ता ?
एवं खलु जंबू ! समणेणं भगवया महावीरेणं आइगरेणं जाव संपत्तेणं णायाणं एगूणवीसं अज्झयणा पण्णत्ता, तंजहाउक्खित्तणाए संघाडे, अंडे कुम्मे य सेलगे । तुंबे य रोहिणी मल्ली, माइंदी चंदिमाइ य ॥१॥ दावद्दवे उदगणाए, मंडुक्के तेयली वि य । णंदिफले अमरकंका, आइण्णे सुसमाइ य ॥२॥ अवरे य पुंडरीए य, णाए एगूणवीस इमे ।
जइ णं भंते ! समणेणं भगवया महावीरेणं आइगरेणं जाव संपत्तेणं णायाणं एगूणवीसं अज्झयणा पण्णत्ता, तंजहा- उक्खित्तणाए जाव पुंडरीए य; पढमस्स णं भंते ! अज्झयणस्स के अढे पण्णत्ते ?
एवं खलु जंबू ! तेणं कालेणं तेणं समएणं इहेव जंबुद्दीवे दीवे भारहे वासे दाहिणड्ढ भरहे, रायगिहे णामं णयरे होत्था, वण्णओ | गुणसीले चेइए, वण्णओ | तत्थ णं रायगिहे णयरे सेणिए णामं राया होत्था । महया-हिमवंत, वण्णओ | तस्स णं सेणियस्स रण्णो णंदा णामं देवी होत्था । सुकुमालपाणिपाया, वण्णओ |
