________________
ज्ञाताधर्मकथा
अत्थमासा ते दुविहा पण्णत्ता, तं जहा- सुवण्णमासा य रुप्पमासा य, ते णं समणाणं णिग्गंथाणं अभक्खेया । तत्थ णं जे ते धण्णमासा दुविहा पण्णत्ता, तं जहासत्थपरिणया य असत्थपरिणया य, एवं जहा धण्णसरिसवा जाव से तेणटेणं सुया ! जाव अभक्खेया वि |
कुलत्था ते भंते ! किं भक्खेया, अभक्खेया ? सुया ! कुलत्था मे भक्खेया वि अभक्खेया वि ।
से केणतुणं भंते ! एवं वुच्चइ जाव अभक्खेया वि ? से णूणं सुया! ते बंभण्णएसु णएसु दुविहा कुलत्था पण्णत्ता, तं जहा- इत्थिकुलत्था य धण्णकुलत्था य । तत्थ णं जे ते इत्थिकुलत्था ते तिविहा पण्णत्ता, तं जहा- कुलकण्णया इ वा, कुलबहुया इ वा, कुलमाउया इ वा, ते णं समणाणं णिग्गंथाणं अभक्खेया । तत्थ णं जे ते धण्णकुलत्था, एवं जहा धण्णसरिसवा जाव से तेणटेणं सुया! जाव अभक्खेया
वि।
से णूणं भंते ! एगे भवं, दुवे भवं, अक्खए भवं, अव्वए भवं, अवट्ठिए भवं, अणेगभूयभावभविए भवं ? सुया ! एगे वि अहं जाव अणेगभूयभाव-भविए वि अहं। से केणटेणं भंते ! एवं वुच्चइ जाव अणेगभूयभाव-भविए वि अहं ? सुया ! दव्वट्ठयाए एगे वि अहं, णाणदंसणट्ठयाए दुवे वि अहं, पएसट्ठयाए अक्खए वि अहं, अव्वए वि अहं, अवट्ठिए वि अहं, उवओगट्ठयाए अणेगभूयभावभविए वि अहं। से तेणद्वेणं स्या ! जाव अणेगभूयभाव-भविए वि अहं ।
एत्थ णं से सुए संबुद्धे थावच्चापुत्तं वंदइ णमंसइ, वंदित्ता णमंसित्ता एवं वयासीइच्छामि णं भंते! तुब्भे अंतिए केवलिपण्णत्तं धम्मं णिसामित्तए | धम्मकहा भाणियव्वा। तए णं सुए परिव्वायए थावच्चापुत्तस्स अंतिए धम्म सोच्चा णिसम्म एवं वयासीइच्छामि णं भंते ! परिव्वायगसहस्सेणं सद्धिं संपरिवुडे देवाणुप्पियाणं अंतिए मुंडे भवित्ता पव्वइत्तए । अहासुहं देवाणुप्पिया ! तए णं सुए परिव्वायए उत्तरपुरच्छिमे दिसीभागे अवक्कमइ अवक्कमित्ता तिदंडयं जाव धाउरत्ताओ य एगंते एडेइ, एडित्ता सयमेव सिहं उप्पाडेइ, उपाडित्ता जेणेव थावच्चापुत्ते जाव पव्वइए। सामाइयमाझ्याई चोद्दसपुव्वाइं अहिज्जइ । तए णं थावच्चापुत्ते सुयस्स अणगारसहस्सं सीसत्ताए वियरइ ।
