________________
ज्ञाताधर्मकथा
हयगया अप्पेगया गयगया एवं रह-सीया-संदमाणीगया अप्पेगइया पायविहारचारेणं पुरिसवग्गुरापरिक्खित्ता कण्हस्स वासुदेवस्स अंतियं पाउब्भवित्था । तए णं कण्हे वासुदेवे समुद्दविजयपामोक्खे दस दसारे जाव अंतियं पाउब्भवमाणे पासित्ता हट्ठ-तुट्ठ जाव कोडुबियपुरिसे सद्दावेइ, सद्दावेत्ता एवं वयासी- खिप्पामेव भो देवाणुप्पिया ! चाउरंगिणिं सेणं सज्जेह, विजयं च गंधहत्थिं उवट्ठवेह । ते वि तह त्ति जाव उवट्ठति । तएणं कण्हे वासुदेवे बहाए जाव पज्जुवासइ । थावच्चापुत्ते वि णिग्गए । जहा मेहे तहेव धम्म सोच्चा णिसम्म जेणेव थावच्चा गाहावइणी तेणेव उवागच्छड़, उवागच्छित्ता, पायग्गहणं करेइ । जहा मेहस्स तहा चेव णिवेयणा ।
तएणं तं थावच्चापुत्तं थावच्चा गाहावइणी, जाहे णो संचाएइ बहूहिं विसयाणुलोमाहिं च विसयपडिकूलाहिं आघवणाहि य पण्णवणाहि य सण्णवणाहि य विण्णवणाहि य आघवित्तए वा पण्णवित्तए वा सण्णवित्तए वा विण्णवित्तए वा, ताहे अकामिया चेव थावच्चापुत्तदारगस्स णिक्खमणमणुमण्णित्था । तए णं सा थावच्चा गाहावइणी आसणाओ अब्भुढेइ, अब्भुद्वित्ता महत्थं महग्घं महरिहं रायारिहं पाहुडं गेण्हइ, गेण्हित्ता मित्त-णाइ जाव सद्धिं संपरिवुडा जेणेव कण्हस्स वासुदेवस्स भवणवर-पडिदुवारदेसभाए तेणेव उवागच्छइ, उवागच्छित्ता पडिहारदेसिएणं मग्गेणं जेणेव कण्हे वासुदेवे तेणेव उवागच्छइ, उवागच्छित्ता करयल जाव वदावेइ, वद्धावित्ता तं महत्थं महग्धं महरिहं रायारिहं पाहुडं उवणेइ, उवणित्ता एवं वयासीएवं खलु देवाणुप्पिया ! मम एगे पुत्ते थावच्चापुत्ते णामं दारए इढे जाव से णं संसारभयउव्विग्गे भीए; इच्छइ अरहओ अरिट्ठणेमिस्स जाव पव्वइत्तए | अहं णं णिक्खमणसक्कारं करेमि । इच्छामि णं देवाणुप्पिया ! थावच्चापुत्तस्स णिक्खममाणस्स छत्तमउडचामराओ य विदिण्णाओ । तए णं कण्हे वासुदेवे थावच्चा गाहावइणिं एवं वयासी- अच्छाहि णं तुमं देवाणुप्पिए ! सुणिव्वुया वीसत्था, अहं णं सयमेव थावच्चापुत्तस्स दारगस्स णिक्खमण- सक्कारं करिस्सामि । तए णं से कण्हे वासुदेवे चाउरंगिणीए सेणाए विजयं हत्थिरयणं दुरुढे समाणे जेणेव थावच्चाए गाहावइणीए भवणे तेणेव उवागच्छइ, उवागच्छित्ता थावच्चापुत्तं एवं वयासी
