________________
ज्ञाताधर्मकथा
बहूणं समणीणं बहूणं सावगाणं बहूणं साविगाणं हीलणिज्जे, परलोए वि य णं आगच्छइ बहूणि दंडणाणि जाव अणुपरियट्टइ, जहा व से कुम्मए अगुत्तिंदिए । तए णं ते पावसियालया जेणेव से दोच्चए कुम्मए तेणेव उवागच्छंति, उवागच्छित्ता तं कुम्मयं सव्वओ समंता उव्वत्तेति जाव दंतेहिं अक्खोडंति । णो चेव णं तस्स किंचि आबाहं वा जाव छविच्छेयं वा करित्तए | तए णं ते पावसियालया दोच्चं पि तच्चं पि जाव णो संचाएंति तस्स कम्मगस्स किंचि आबाहं वा पवाहं विबाहं वा उप्पाएत्तए, छविच्छेयं वा करित्तए, ताहे संता तंता परितंता णिव्विण्णा समाणा जामेव दिसिं पाउब्भूया तामेव दिसिं पडिगया ।
तए णं से कुम्मए ते पावसियालए चिरंगए दूरंगए जाणित्ता सणियं-सणियं गीवं णीणेइ, णीणेत्ता दिसावलोयं करेइ, करित्ता जमगसमगं चत्तारि वि पाए णीणेइ, णीणेत्ता ताए उक्किट्ठाए कम्मगईए वीईवयमाणे-वीईवयमाणे जेणेव मयंगतीरद्दहे तेणेव उवागच्छइ, उवागच्छित्ता मित्त-णाइ-णियग-सयण-संबंधि-परियणेणं सद्धिं अभिसमण्णागए यावि होत्था।
एवामेव समणाउसो ! जो अम्हं समणो वा समणी वा आयरिय-उवज्झायाणं अंतिए पव्वइए समाणे पंच से इंदियाइं गुत्ताइं भवंति जाव से णं इहभवे चेव बहूणं समणाणं बहूणं समणीणं बहूणं सावयाणं बहूणं सावियाण य अच्चणिज्जे वंदणिज्जे णमंसणिज्जे पूयणिज्जे सक्कारणिज्जे सम्माणणिज्जे कल्लाणं मंगलं देवयं चेइयं विणएण पज्जुवासणिज्जे भवइ । परलोए वि य णं णो बहुणि हत्थछेयणाणि य कण्णच्छेयणाणि य णासाछेयणाणि य हिययउप्पाडणाणि य वसणुप्पाडणाणि य उल्लंबणाणि य पाविहिइ । पुणो अणाइयं च णं अणवदग्गं दीहमद्धं चाउरंतं संसारकंतारं वीइवइस्सइ; जहा व से कुम्मए गुत्तिंदिए । एवं खलु जंबू ! समणेणं भगवया महावीरेणं चउत्थस्स णायज्झयणस्स अयमढे पण्णत्ते । ॥ त्ति बेमि ||
१४
|| चउत्थं अज्झयणं समत्त ||
