________________
ज्ञाताधर्मकथा
एवामेव समणाउसो ! जो अम्हं णिग्गंथो वा णिग्गंथी वा पव्वइए समाणे पंचसु महव्वएस, छसु जीवणिकाएसु, णिग्गंथे पावयणे य णिस्संकिए णिक्कंखिए णिव्वितिगिच्छे, से णं इह भवे बहूणं समणाणं समणीणं जाव वीइवइस्सइ । एवं खलु जंबू ! समणेणं भगवया महावीरेणं जाव णायाणं तच्चस्स अज्झयणस्स अयमढे पण्णत्ते | ॥त्ति बेमि॥
॥ तइअं अज्झयणं समत्त ||
चउत्थ अज्झयणं
कुम्मे
जइ णं भंते ! समणेणं भगवया महावीरेणं तच्चस्स णायज्झयणस्स अयमढे पण्णत्ते, चउत्थस्स णं णायझयणस्स के अढे पण्णत्ते ?
एवं खलु जंबू ! तेणं कालेणं तेणं समएणं वाणारसी णामं णयरी होत्था, वण्णओ | तीसे णं वाणारसीए णयरीए बहिया उत्तरपुरत्थिमे दिसिभागे गंगाए महाणईए मयंगतीरद्दहे णामं दहे होत्था-अणुपुव्वसुजायवप्प-गंभीरसीयलजले अच्छ-विमल-सलिल-पलिच्छण्णे संछण्णपत्त-पुप्फ-पलासे-बहुउप्पल-पउम-कुमुय-णलिण-सुभग-सोगंधिय-पुंडरीय-महापुंडरीय-सयपत्तसहस्सपत्त- केसर-पुप्फोवचिए पासाईए दरिसणिज्जे अभिरूवे पडिरूवे । तत्थ णं बहूणं मच्छाण य कच्छभाण य गाहाण य मगराण य सुंसमाराण य सयाणि य सहस्साणि य सयसहस्साणि य जूहाइं णिब्भयाइं णिरुव्विग्गाइं सुहंसुहेणं अभिरममाणाई अभिरममाणाई विहरंति |
तस्स णं मयंगतीरद्दहस्स अदूरसामंते, एत्थ णं महं एगे मालयाकच्छए होत्था, वण्णओ | तत्थ णं दुवे पावसियालगा परिवसंति- पावा चंडा रोद्दा तल्लिच्छू साहसिया लोहियपाणी आमिसत्थी आमिसाहारा आमिसप्पिया आमिसलोला आमिसं गवेसमाणा रत्तिं वियालचारिणो दिया पच्छण्णं चावि चिट्ठति । तए णं ताओ मयंगतीरद्दहाओ अण्णया कयाइं सूरियंसि चिरत्थमियंसि लुलियाए संझाए पविरलमाणुसंसि णिसंतपडिणिसंतंसि समाणंसि दुवे कुम्मगा आहारत्थी आहारं गवसमाणा सणियं-सणियं उत्तरंति, तस्सेव मयंगतीरद्दहस्स परिपेरंतेणं सव्वओ समंता परिघोलेमाणा परिघोलेमाणा वित्तिं कप्पेमाणा विहरंति ।
