________________
ज्ञाताधर्मकथा
य लोमहत्थेणं पमज्जइ, उदगधाराए अब्भुक्खेइ, अब्भुक्खित्ता पम्हल-सुकुमालाए गंधकासाईए गायाइं लूहेइ, लूहित्ता महरिहं वत्थारुहणं च मल्लारुहणं च गंधारुहणं च चुण्णारुहणं च वण्णारुहणं च करेइ, करित्ता धूवं डहइ, डहित्ता जाणुपायवडिया पंजलिउडा एवं वयासी
जइ णं अहं दारगं वा दारिगं वा पयायामि तो णं अहं जायं च जाव अक्खयणिहिं च अणुवुड्ढेमि त्ति कट्ट उवाइयं करेइ, करित्ता जेणेव पोक्खरिणी तेणेव उवागच्छइ, उवागच्छित्ता विउलं असण-पाण-खाइम-साइमं आसाएमाणी जाव विहरइ | जिमियभुत्तुत्तरागया वि य णं समाणा आयंता चोक्खा परमसुइभूया जेणेव सए गिहे तेणेव उवागया ।
अदुत्तरं च णं भद्दा सत्थवाही चाउद्दसहमुद्दिट्ठपुण्णमासिणीसु विउलं असणं-पाणं-खाइम साइमं उवक्खडेइ, उवक्खडित्ता बहवे णागा य जाव वेसमणा य उवायमाणी णमंसमाणी जाव एवं च णं विहरइ ।
तए णं सा भद्दा सत्थवाही अण्णया कयाइ केणइ कालंतरेणं आवण्णसत्ता जाया यावि होत्था। तए णं तीसे भद्दाए सत्यवाहीए दोसु मासेसु वीइक्कंतेसु तइए मासे वट्टमाणे इमेयारूवे दोहले पाउब्भूए- धण्णाओ णं ताओ अम्मयाओ जाव कयलक्खणाओ णं ताओ अम्मयाओ, जाओ णं विउलं असणं पाणं खाइमं साइमं सुबहयं पुप्फ-वत्थ-गंधमल्लालंकारं गहाय मित्त-णाइ-णियग-सयण-संबंधि-परियण-महिलियाहिं च सद्धिं संपरिवुडाओ रायगिहं णयरं मज्झंमज्झेणं णिग्गच्छंति, णिग्गच्छित्ता जेणेव पुक्खरिणी तेणेव उवागच्छंति, उवागच्छित्ता पोक्खरिणिं ओगाहिंति, ओगाहित्ता बहायाओ जाव सव्वालंकारविभूसियाओ विउलं असणं पाणं खाइमं साइमं आसाएमाणीओ विसाएमाणीओ परिभाएमाणीओ परिभंजेमाणीओ दोहलं विणेति; एवं संपेहेइ, संपेहित्ता कल्लं जाव जलंते जेणेव धण्णे सत्थवाहे तेणेव उवागच्छइ, उवागच्छित्ता धण्णं सत्थवाहं एवं वयासी- एवं खलु देवाणुप्पिया! मम तस्स गब्भस्स दोसु मासेसुं वीइकंतेसु तइए मासे वट्टमाणे जाव विणेति; तं इच्छामि णं देवाणुप्पिया ! तुब्भेहिं अब्भणुण्णाया समाणी जाव विणित्तए | अहासुहं देवाणुप्पिए ! मा पडिबंध करेह । तए णं सा भद्दा सत्थवाही धण्णेणं सत्थवाहेणं अब्भणुण्णाया समाणी हद्वतुट्ठा जाव विउलं असणं पाणं खाइमं साइमं उवक्खडावेइ, उवक्खडावेत्ता ण्हाया जाव उल्लपडसाडगा जेणेव णागघरए जाव धूवं करेइ, करेत्ता जेणेव पोक्खरिणी तेणेव उवागच्छड़ । तए णं ताओ मित्त-णाइ जाव णगरमहिलाओ भदं सत्थवाहिं सव्वालंकार-विभूसियं करेइ । तए णं सा भद्दा सत्थवाही ताहिं मित्त-णाइ -णियग-सयण-संबंधि-परिजण-णगर-महिलियाहिं सद्धिं तं
