________________
ज्ञाताधर्मकथा
बीअं अज्झयणं
संघाडे
जड़ णं भंते ! समणेणं भगवया महावीरेणं पढमस्स णायज्झयणस्स अयमढे पण्णत्ते, बिइयस्स णं भंते ! णायज्झयणस्स के अटे पण्णत्ते ?
एवं खलु जंबू ! तेणं कालेणं तेणं समएणं रायगिहे णामं णयरे होत्था, वण्णओ | तत्थ णं रायगिहे णयरे सेणिए राया होत्था, वण्णओ | तस्स णं रायगिहस्स णयरस्स बहिया उत्तरपुरच्छिमे दिसीभाए गुणसीलए णामं चेइए होत्था, वण्णओ ।
तस्स णं गुणसीलयस्स चेइयस्स अदूरसामंते एत्थ णं महं एगे, जिण्णुज्जाणे यावि होत्थाविणट्ठदेवउले परिसडियतोरणघरे णाणाविहगुच्छ- गुम्म-लया -वल्लि-वच्छच्छाइए अणेगवालसय-संकणिज्जे यावि होत्था । तस्स णं जिण्णुज्जाणस्स बहुमज्झदेसभाए, एत्थ णं महं एगे भग्गकूवए यावि होत्था । तस्स णं भग्गकूवस्स अदूरसामंते, एत्थ णं महं एगे मालुयाकच्छए यावि होत्था, किण्हे किण्होभासे जाव रम्मे महामेहणिउरंबभूए बहूहिं रुक्खेहि य गुच्छेहि य गुम्मेहि य लयाहि य वल्लीहि य तणेहि य कुसेहि य खाणुएहि य संछण्णे पलिच्छण्णे अंतो झुसिरे, बाहिं गंभीरे, अणेग-वालसयसंकणिज्जे यावि होत्था ।
तत्थं णं रायगिहे णगरे धण्णे णामं सत्थवाहे अड्ढे दित्ते जाव विउलभत्त- पाणे | तस्स णं घण्णस्स सत्थवाहस्स भद्दा णामं भारिया होत्था- सुकुमालपाणिपाया अहीणपडिणुण्णपंचिंदिय-सरीरा लक्खण-वंजण-गुणोववेया माणुम्माण-प्पमाण-पडिपुण्ण-सुजायसव्वंगसुंदरंगी ससिसोमागारा-कंत-पियदंसणा सुरूवा करयल-परिमिय-तिवलिय-मज्झा कुंडलुल्लिहिय-गंडलेहा कोमुइ-रयणियर-पडिपुण्ण-सोमवयणा सिंगारागारचारुवेसा जाव पडिरूवा वंझा अवियाउरी जाणुकोप्परमाया यावि होत्था । तस्स णं धण्णस्स सत्यवाहस्स पंथए णामं दासचेडे होत्था- सव्वंगसुंदरंगे मंसोवचिए बालकीलावणकुसले यावि होत्था | तए णं से धण्णे सत्थवाहे रायगिहे णयरे बहूणं णगर-णिगम -सेट्ठि -सत्थवाहाणं अट्ठारसण्हं य सेणिप्पसेणीणं बहुसु कज्जेसु य कुडुंबेसु य मंतेसु य जाव चक्खुभूए यावि होत्था । णियगस्स वि य णं कुटुंबस्स बहुसु य कज्जेसु जाव चक्खुभूए यावि होत्था ।
