Page Text
________________
ज्ञाताधर्मकथा
आयाभंडे इडे कंते पिए मणुण्णे मणामे। एस मे णित्थारिए समाणे संसारवोच्छेयकरे भविस्सइ । तं इच्छामि णं देवाणुप्पियाहिं सयमेव पव्वावियं, सयमेव मुंडावियं, सयमेव सेहावियं, सयमेव सिक्खावियं, सयमेव आयार- गोयर- विणय-वेणइय-चरण-करण-जायामायावत्तियं धम्ममाइक्खियं ।
तए णं समणे भगवं महावीरे मेहं कुमारं सयमेव पव्वावेइ जाव धम्ममाइक्खइ-एवं देवाणुप्पिया ! गंतव्वं, एवं चिट्ठियव्वं, एवं णिसीयव्वं, एवं तुयट्टियव्वं, एवं भुंजियव्वं, एवं भासियव्वं, एवं उढाए उट्ठाए पाणेहिं भूएहिं जीवेहिं सत्तेहिं संजमेणं संजमियव्वं, अस्सिं च णं अढे णो पमाएयव्वं ।
तए णं से मेहे कुमारे समणस्स भगवओ महावीरस्स अंतिए इमं एयारूवं धम्मियं उवएसं सम्म पडिवज्जइ-तमाणाए तह गच्छड़, तह चिट्ठइ जाव उट्ठाए उठाए पाणेहिं भूएहिं जीवेहिं सत्तेहिं संजमइ ।
जं दिवसं च णं मेहे अणगारे मुंडे भवित्ता अगाराओ अणगारियं पव्वइए, तस्स णं दिवसस्स पच्चावरण्हकालसमयंसि समणाणं णिग्गंथाणं अहाराइणियाए सेज्जा-संथारएस विभज्जमाणेसु मेहअणगारस्स दारमूले सेज्जासंथारए जाए यावि होत्था । तए णं समणा णिग्गंथा पुव्वरत्तावरत्तकालसमयंसि वायणाए पुच्छणाए परियट्टणाए धम्माणओगचिंताए य उच्चारस्स वा पासवणस्स वा अइगच्छमाणा य णिग्गच्छमाणा य अप्पेगइया मेहं कुमारं हत्थेहिं संघटुंति, एवं पाएहिं सीसे पोट्टे कायंसि अप्पेगइया ओलंडेंति अप्पेगइया पोलंडेंति, अप्पेगइया पाय-रय- रेणु-गुंडियं करेंति । एवं महालियं च णं रयणिं मेहे कुमारे णो संचाएइ खणमवि अच्छिं णिमीलित्तए |
११९ तए णं तस्स मेहस्स कुमारस्स अयमेयारूवे अज्झत्थिए जाव सम्प्पज्जित्था- एवं खल
अहं सेणियस्स रण्णो पत्ते धारिणीए देवीए अत्तए मेहे जाव सवणयाए | तं जया णं अहं अगारमज्झे वसामि, तया णं ममं समणा णिग्गंथा आढायंति, परिजाणंति, सक्कारेंति, सम्माणेति, अट्ठाई हेऊइं पसिणाई कारणाई वागरणाई आइक्खंति, इट्ठाहिं कंताहिं वग्गूहिं आलवेंति, संलवेंति, जप्पभिइं च णं अहं मुंडे भवित्ता अगाराओ अणगारियं पव्वइए, तप्पभिई च णं मम समणा णो आढायंति जाव णो संलवेंति । अत्तरं च णं मम समणा णिग्गंथा राओ पुव्वरत्तावरत्तकालसमयंसि वायणाए पुच्छणाए जाव महालियं च णं रत्तिं णो संचाएमि अच्छिं णिमीलित्तए । तं सेयं खलु मम कल्लं पाउप्पभायाए रयणीए उद्वियम्मि सूरे सहस्सरस्सिम्मि दिणयरे तेयसा जलंते समणं भगवं महावीरं आपुच्छित्ता पुणरवि अगारमज्झे वसित्तए त्ति कटु एवं संपेहेइ, संपेहित्ता अट्ट-दुहट्ट-वसट्ट-माणसगए
| SR No. | 009906 |
| Book Title | Agam 06 Ang 06 Gnatadharma Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 220 |
| Language | Prakrit |
| Classification | Book_Devnagari, Agam, Canon, & agam_gyatadharmkatha |
| File Size | 5 MB |