________________
ज्ञाताधर्मकथा
तए णं धण्णे सत्थवाहे चिलायं दासचेडं एयमद्वं भज्जो भज्जो णिवारेइ, णो चेव णं चिलाए दासचेडे उवरमइ । तए णं से चिलाए दासचेडे तेसिं बहूणं दारयाण य दारियाण य डिंभयाण य डिभियाण य कुमारयाण य कुमारियाण य अप्पेगइगाणं खुल्लए अवहरइ जाव अप्पेगइए तालेइ । तए णं ते बहवे दारया य दारिया य डिंभया य डिभिया य कुमारया य कुमारिया य रोयमाणा य जाव अम्मापिऊणं णिवेदेति । तए णं ते अम्मा-पियरो आसुरुत्ता जाव जेणेव धण्णे सत्थवाहे तेणेव उवागच्छंति, उवागच्छित्ता बहूहिं खिज्जणाहि य जाव एयमढें णिवेदेति । तए णं से धण्णे सत्थवाहे बहूणं दारयाणं दारियाणं डिंभयाणं डिभियाणं कुमारयाणं कुमारियाणं अम्मापिऊणं अंतिए एयमहूँ सोच्चा आसुरुत्ते जाव चिलायं दासचेडं उच्चावयाहिं आउसणाहि आउसइ उद्धंसइ णिब्भच्छेड़ णिच्छोडेइ तज्जेइ उच्चावयाहिं तालणाहिं तालेइ साओ गिहाओ णिच्छुभइ ।। तए णं से चिलाए दासचेडे साओ गिहाओ णिच्छुढे समाणे रायगिहे णयरे सिंघाडए जाव पहेसु य देवकुलेसु य सभासु य पवासु य जूयखलएसु य वेसाघरएसु य पाणघरएसु य सुहंसुहेणं परियट्टइ । तए णं चिलाए दासचेडे अणोहट्टिए अणिवारिए सच्छंदमई सइरप्पयारी मज्जपसंगी चोज्जप्पसंगी मंसप्पसंगी जूयप्पसंगी वेसाप्पसंगी परदारप्पसंगी जाए यावि होत्था । तए णं रायगिहस्स णगरस्स अदूरसामंते दाहिणपुरत्थिमे दिसिभाए सीहगुहा णामं चोरपल्ली होत्था-विसम-गिरिकडग-कोडंब-सण्णिविट्ठा वंसीकलं-पागारपरिक्खित्ता छिण्णसेलविसमप्पवाय- फरिहोवगूढा एगदुवारा अणेगखंडी विदितजण-णिग्गमपवेसा अभिंतरपाणिया सुदुल्लभजलपेरंता सुबहुस्स वि कूवियबलस्स आगयस्स दुप्पहंसा यावि होत्था। तत्थ णं सीहगुहाए चोरपल्लीए विजए णामं चोरसेणावई परिवसइ- अहम्मिए जाव अहम्मकेऊ समुट्ठिए बहुणगर-णिग्गय-जसे सूरे दढप्पहारी साहसिए सद्दवेही। से णं तत्थ सीहगुहाए चोरपल्लीए पंचण्डं चोरसयाणं आहेवच्चं जाव विहरइ । । तए णं से विजए तक्करे चोरसेणावई बहूणं चोराण य पारदारियाण य गंठिभेयगाण य संधिच्छेयगाण य खत्तखणगाण य रायावगारीण य अणधारगाण य बालघायगाण य वीसंभघायगाण य जयकाराण य खंडरक्खाण य अण्णेसिं च बहणं छिण्ण-भिण्ण बाहिराहयाणं कुडंगे यावि होत्था ।
191
