________________
ज्ञाताधर्मकथा
२१
एवामेव समणाउसो ! जो अम्हं णिग्गंथो वा णिग्गंथी वा सद्द- फरिस-रस-रूव-गंधेसु णो सज्जइ, से णं इहलोगे चेव बहूणं समणाणं समणीणं सावयाणं सावियाणं अच्चणिज्जे जाव चाउरंत-संसारकंतारं वीइवयइ । तत्थ णं अत्थेगइया आसा जेणेव उक्किट्ठ सद्दफरिसरसरूवगंधा तेणेव उवागच्छंति, उवागच्छित्ता तेसु उक्किडेसु सद्दफरिसरसरूवगंधेसु मुच्छिया जाव अज्झोववण्णा आसेविउं पयत्ता यावि होत्था । तए णं ते आसा एए उक्किट्ठ सद्दफरिसरसरूवगंधा आसेवमाणा तेहिं बहूहिं कूडेहिं य पासेहि य गलएसु य पाएसु य बज्झंति । तए णं ते कोडुबिया एए आसे गिव्हंति, गिण्हित्ता एगट्ठियाहिं पोयवहणे संचारेंति, संचारित्ता तणस्स य कट्ठस्स य जाव भरेंति । तए णं ते संजत्ता णावावाणियगा दक्खिणाणकलेणं वाएणं जेणेव गंभीरए पोयपट्टणे तेणेव उवागच्छंति, उवागच्छित्ता पोयवहणं लंबेंति, लंबिता ते आसे उत्तारेंति, उत्तारित्ता जेणेव हत्थिसीसे णयरे, जेणेव कणगकेऊ राया तेणेव उवागच्छंति, उवागच्छित्ता करयल जाव वद्धावेंति वद्धावित्ता ते आसे उवणेति। तए णं से कणगकेऊ राया तेसिं संजत्ता-णावावाणियगाणं उस्सुक्कं वियरइ, वियरित्ता सक्कारेइ सम्माणेइ, सक्कारिता सम्माणित्ता पडिविसज्जेइ । तए णं से कणगकेऊ राया कोडुबियपुरिसे सद्दावेइ, सद्दावित्ता सक्कारेइ सम्माणेइ, सक्कारित्ता सम्माणित्ता पडिविसज्जेइ ।। तए णं से कणगकेऊ राया आसमद्दए सद्दावेइ, सद्दावित्ता एवं वयासी- तुब्भे णं देवाणुप्पिया! मम आसे विणएह । तए णं ते आसमद्दगा तह त्ति पडिसुणेति, पडिसुणित्ता ते आसे बहूहिं मुहबंधेहि य, कण्णबंधेहि य, णासाबंधेहि य, वालबंधेहि य, खुरबंधेहि य कडगबंधेहि य खलिणबंधेहि य, अहिलाणेहि य, पडयाणेहि य, अंकणाहि य, वेत्तप्पहारेहि य, लयप्पहारेहि य, कसप्पहारेहि य, छिवप्पहारेहि य विणयंति, विणइत्ता कणगकेउस्स रण्णो उवणेति । तए णं से कणगकेऊ ते आसमद्दए सक्कारेइ, सम्माणेइ सक्कारित्ता सम्माणित्ता पडिविसज्जेइ । तए णं ते आसा बहूहिं मुहबंधेहि य जाव छिवप्पहारेहि य बहूणि सारीरमाणसाणि दुक्खाई पार्वेति । एवामेव समणाउसो ! जो अम्हं णिग्गंथो वा णिग्गंथी वा पव्वइए समाणे इडेसु सद्दफरिस-रस-रूव-गंधेसु सज्जइ, रज्जइ, गिज्झइ, मुज्झइ, अज्झोववज्जइ, से णं इह लोए चेव बहूणं समणाण य जाव चाउरंतसंसारकंतारं भुज्जो भुज्जो अणुपरियट्टिस्सइ ।
२४
189
