________________
ज्ञाताधर्मकथा
२९ सा णं तओहिंतो अणंतरं उव्वट्टित्ता तच्चं पि मच्छेसु उववण्णा । तत्थ वि य णं
सत्थवज्झा दाहवक्कंतीए कालं किच्चा दोच्चं पि छट्ठीए पुढवीए उक्कोसेणं बावीससागरोवम ठिइएसु णरएसु रइयत्ताए उववण्णा । तओ अणंतरं उव्वट्टित्ता उरएसु, एवं जहा गोसाले तहा णेयव्वं जाव खरबायर पुढविकाइएसु, अणेगसयसहस्सखुत्तो । सा णं तओ अणंतरं उव्वट्टित्ता इहेव जंबुद्दीवे दीवे भारहे वासे चंपाए णयरीए सागरदत्तस्स सत्थवाहस्स भद्दाए भारियाए कुच्छिंसि दारियत्ताए पच्चायाया । तए णं सा भद्दा सत्यवाही णवण्हं मासाणं बहुपडिपुण्णाणं दारियं पयाया । सुकुमालकोमलियं गय- तालुयसमाणं । तीसे दारियाए णिव्वत्ते बारसाहियाए अम्मापियरो इमं एयारूवं गोण्णं गुणणिप्फण्णं णामधेज्जं करेंति- जम्हा णं अम्हं एसा दारिया सुकुमाला गयतालुयसमाणा, तं होउ णं अम्हं इमीसे दारियाए णामधेज्जं सुकुमालिया । तए णं तीसे दारियाए अम्मापियरो
णामधेज्जं करेंति “सुकुमालिय" त्ति | ३३ तए णं सा सुकुमालिया दारिया पंचधाईपरिग्गहिया, तंजहा- खीरधाईए जाव
गिरिकंदरमल्लीणा इव चंपगलया णिव्वाय-णिव्वाघायंसि सुहंसुहेणं परिवड्ढइ । तए णं सा सकमालिया दारिया उम्मक्कबालभावा जाव रूवेण य जोव्वणेण य लावण्णेण य उक्किट्ठा
उक्किट्ठसरीरा जाया यावि होत्था । ३४ तत्थ णं चंपाए णयरीए जिणदत्ते णामं सत्थवाहे, वण्णओ । तस्सणं जिणदत्तस्स भद्दा
भारिया, सूमाला इट्ठा जाव माणुस्सए कामभोए पच्चणुब्भवमाणा विहरइ । तस्स णं जिणदत्तस्स पुत्ते, भद्दाए भारियाए अत्तए, सागरए णामं दारए सुकुमालपाणिपाए जाव सुरूवे । तए णं से जिणदत्ते सत्यवाहे अण्णया कयाइ साओ गिहाओ पडिणिक्खमइ, पडिणिक्खमित्ता सागरदत्तस्स गिहस्स अदूरसामंतेणं वीईवयइ । इमं च णं सूमालिया दारिया बहाया, चेडियासंघपरिवुडा उप्पिं आगासतलगंसि कणग-तिंदूसएणं कीलमाणीकीलमाणी विहरइ । तए णं ते जिणदत्ते सत्थवाहे सूमालियं दारियं पासइ, पासित्ता सूमालियाए दारियाए रूवे य जोव्वणे य लावण्णे य जायविम्हए; कोडुबियपुरिसे सद्दावेइ, सद्दावित्ता एवं वयासी- एस णं देवाणुप्पिया! कस्स दारिया ? किं वा णामधेज्जं से ? तए णं ते कोडुबियपुरिसा जिणदत्तेणं सत्थवाहेणं एवं वुत्ता समाणा हद्वतुट्ठा करयल जाव एवं वयासी- एस णं देवाणुप्पिया ! सागरदत्तस्स सत्थवाहस्स धूया भद्दाए भारियाए
155
