________________
ज्ञाताधर्मकथा
उत्तरिज्जाओ । सव्वोउय-सुरभिकुसुम-पवरमल्लसोभितसिराओ, कालागुरु धूव धूवियाओ, सिरि-समाणवेसाओ ।
सेयणय-गंधहत्थिरयणं दुरूढाओ समाणीओ, सकोरंटमल्लदामेणं छत्तेणं धरिज्जमाणेणं चंदप्पभ वइर वेरुलिय-विमलदंड-संख-कुंद-दगरय-अमयमहिय-फेणपुंजसण्णिगास-चउचामरवालवीजियंगीओ सेणिएणं रण्णा सद्धि हत्थिखंधवरगएणं पिटुओ णगच्छमाणीओ चउरंगिणीए सेणाए महया हयाणीएणं गयाणीएणं रहाणीएणं, पायत्ताणीएणं सव्विड्ढीए सव्वज्जईए जाव णिग्घोस-णाइयरवेणं रायगिहं सिंघाडग तिय चउक्क चच्चर-चउम्मह महापहपहेसु आसित्त- सित्त-सुइय-संमज्जिओवलित्तं जाव सुगंधवरगंधियं गंधवट्टिभूयं अवलोएमाणीओ णागरजणेणं अभिणंदिज्जमाणीओ गुच्छ-लया-रुक्ख-गुम्म-वल्लिगुच्छोच्छाइयं सुरम्मं वेभारगिरि-कडग-पायमूलं सव्वओ समंता आहिँडेमाणीओ आहिंडेमाणीओ दोहलं विणियंति। तं जड़ णं अहमवि मेहेसु अब्भुग्गएसु जाव दोहलं विणिज्जामि ।
तए णं सा धारिणी देवी तंसि दोहलंसि अविणिज्जमाणंसि असंपण्णदोहला असंपुण्णदोहला असम्माणियदोहला सुक्का भुक्खा णिम्मंसा ओलुग्गा ओलुग्गसरीरा पमइलदुब्बला किलंता ओमंथियवयण-णयणकमला पंडुइयमुही करयलमलियव्व चंपगमाला णित्तेया दीणविवण्णवयणा जहोचियपुप्फ-गंध-मल्लालंकार-हारं अणभिलसमाणी कीडारमण-किरियं च परिहावेमाणी दीणा दुम्मणा णिराणंदा भूमिगयदिट्ठीया ओहयमणसंकप्पा करयलपल्हत्थमुही अट्टज्झाणोवगया झियायइ। तए णं तीसे धारिणीए देवीए अंगपडियारियाओ अभिंतरियाओ दासचेडीयाओ धारिणिं देविं ओलुग्गं जाव झियायमाणिं पासंति, पासित्ता एवं वयासी- किं णं तुमे देवाणुप्पिए ! ओलुग्गा ओलुग्गसरीरा जाव झियायसि ? तए णं सा धारिणी देवी ताहिं अंगपडियारियाहिं अभिंतरियाहिं दासचेडियाहिं एवं वृत्ता समाणी ताओ दासचेडियाओ णो आढाइ, णो य परियाणइ, अणाढायमाणी अपरियाणमाणी तुसिणीया संचिट्ठइ । तए णं ताओ अंगपडियारियाओ अभिंतरियाओ दासचेडियाओ धारिणिं देविं दोच्चं पि तच्चं पि एवं वयासी-किं णं तुमे देवाणुप्पिये ! ओलुग्गा ओलुग्गसरीरा जाव झियायसि ?
तए णं धारिणी देवी ताहिं अंगपडियारियाहिं अभिंतरियाहिं दासचेडियाहिं दोच्चं पि तच्चं पि एवं वत्ता समाणी णो आढाइ, णो परियाणाइ, अणाढायमाणी अपरियाणमाणी तुसिणीया संचिट्ठइ ।
10
