________________
ज्ञाताधर्मकथा
तए णं जियसत्तु राया सुबुद्धिं अमच्चं एवं वयासी-अच्छासु ताव देवाणुप्पिया ! कइवयाई वासाइं उरलाई माणुस्सगाई भोगभोगाइं भुंजमाणा तओ पच्छा एगयओ थेराणं अंतिए मुंडे भवित्ता णं जाव पव्वइस्सामो | तए णं सुबुद्धि अमच्चे जियसत्तुस्स रण्णो एयमद्वं पडिसुणेइ । तए णं तस्स जियसत्तुस्स रण्णो सुबुद्धिणा सद्धिं विउलाई माणुस्स जाव पच्चणुब्भवमाणस्स दुवालस वासाइं वीइक्कंताई। तेणं कालेणं तेणं समएणं थेरागमणं । तए णं जियसत्तु राया धम्म सोच्चा एवं जं णवरं देवाणुप्पिया ! सुबुद्धिं आमंतेमि, जेट्टपुत्तं रज्जे ठवेमि, तए णं तुब्भं अंतिए जाव पव्वयामि। अहासुहं देवाणुप्पिया । तए णं जियसत्तु राया जेणेव सए गिहे तेणेव उवागच्छइ, उवागच्छित्ता सुबुद्धिं सद्दावेइ, सद्दावित्ता एवं वयासी- एवं खलु मए थेराणं जाव पव्वज्जामि, तुमं णं किं करेसि ? तए णं सुबुद्धी जियसत्तुं एवं वयासी-जाव के अण्णे आहारे वा जाव पव्वयामि । तएणं जियसत्तु राया सुबुद्धिं अमच्चं एवं वयासी- तं जइ णं देवाणुप्पिया ! जाव पव्वयाहि; गच्छह णं देवाणुप्पिया ! जेट्टपुत्तं कुडुंबे ठावेहि, ठावित्ता सीयं दुरुहित्ता णं ममं अंतिए जाव पाउब्भवह। तए णं सुबुद्धी अमच्चे तहेव जाव पाउब्भवइ । तए णं जियसत्तु कोडुबियपुरिसे सद्दावेइ, सद्दावित्ता एवं वयासी-गच्छह णं तुब्भे देवाणुप्पिया! अदीणसत्तुस्स कुमारस्स रायाभिसेयं उवट्ठवेह । जाव अभिसिंचंति जाव
पव्वइए । २९ तए णं जियसत्तु रायरिसी एक्कारस अंगाई अहिज्जइ, अहिज्जित्ता बहूणि वासाणि
सामण्ण परियायं पाउणित्ता मासियाए संलेहणाए अत्ताणं झूसेत्ता जाव सिद्धे । तए णं सुबुद्धी अणगारे वि एक्कारस अंगाई अहिज्जित्ता, बहूणि वासाणि सामण्ण परियायं
पाउणित्ता मासियाए संलेहणाए अत्ताणं झूसित्ता जाव सिद्धे । ३० एवं खलु जंबू ! समणेणं भगवया महावीरेणं बारसमस्स णायज्झयणस्स अयमढे पण्णत्ते ।
॥ त्ति बेमि ||
॥ बारसमं अज्झयणं समत्तं ||
129
