________________
ज्ञाताधर्मकथा
|
अहो णं देवाणुप्पिया ! इमे मणुण्णे असणं पाणं खाइमं साइमं वण्णेणं उववेए जाव फासेणं उववेए अस्सायणिज्जे विस्सायणिज्जे पीणणिज्जे दीवणिज्जे दप्पणिज्जे मयणिज्जे बिहणिज्जे सव्विंदियगाय-पल्हायणिज्जे । तए णं ते बहवे राईसर जाव सत्यवाहपभिइओ जियसत्तुं एवं वयासी- तहेव णं सामी ! जं णं तुब्भे वदह- अहो णं इमे मणुण्णे असणं पाणं खाइमं साइमं वण्णेणं उववेए जाव पल्हायणिज्जे। तए णं जियसत्तु सुबुद्धिं अमच्चं एवं वयासी- अहो णं सुबुद्धी ! इमे मणुण्णे असणं पाणं खाइमं साइमं जाव पल्हायणिज्जे । तए णं सुबुद्धी अमच्चे जियसत्तुस्स रण्णो एयमढे णो आढाइ णो परियाणाइ । तएणं जियसत्तु राया सुबुद्धिं दोच्चपि तच्चपि एवं वयासी- अहो णं देवाणुप्पिया सुबुद्धी! इमे मणुण्णे जाव सव्विंदियगाय पल्हायणिज्जे | तए णं सुबुद्धी अमच्चे जियसत्तुणा रण्णा दोच्चं पि तच्चं पि एवं वुत्ते समाणे जियसत्तुं रायं एवं वयासी- णो खलु सामी ! अहं एयंसि मणुण्णंसि असण-पाण-खाइम- साइमंसि केइ विम्हए। एवं खलु सामी ! सुब्भिसद्दा वि पुग्गला दुब्भिसद्दत्ताए परिणमंति, दुन्भिसद्दा वि पोग्गला सुब्भिसद्दत्ताए परिणमंति । सुरुवा वि पोग्गला दुरूवत्ताए परिणमंति, दुरूवा वि पोग्गला सुरूवत्ताए परिणमंति | सुब्भिगंधा वि पोग्गला दुब्भिगंधत्ताए परिणमंति, दुब्भिगंधा वि पोग्गला सुब्भिगंधत्ताए परिणमंति । सुरसा वि पोग्गला दुरसत्ताए परिणमंति, दुरसा वि पोग्गला सुरसत्ताए परिणमंति । सुहफासा वि पोग्गला दुहफासत्ताए परिणमंति, दुहफासा वि पोग्गला सुहफासत्ताए परिणमंति । पओग-वीससा-परिणया वि य णं सामी! पोग्गला पण्णत्ता | तए णं से जियसत्तु राया सुबुद्धिस्स अमच्चस्स एवमाइक्खमाणस्स एयमद्वं णो आढाइ, णो परियाणइ, तुसिणीए संचिट्ठइ । तए णं से जियसत्तु राया अण्णया कयाइ ण्हाए जाव आसखंधवरगए महया भडचडगरपह-करविंद-परिक्खित्ते आसवाहिणियाए णिज्जायमाणे तस्स फरिहोदगस्स अदूरसामंतेणं वीईवयइ। तए णं जियसत्तु राया तस्स फरिहोदगस्स असुभेणं गंधेण अभिभूए समाणे सएणं उत्तरिज्जेण आसगं पिहेइ, एगंतं अवक्कमइ, ते बहवे ईसर जाव सत्यवाह पभिइओ एवं वयासी- अहो णं देवाणुप्पिया ! इमे फरिहोदए अमणुण्णे वण्णेणं गंधेणं रसेणं फासेणं, से जहाणामए अहिमडे इ वा जाव अमणामतराए चेव गंधेणं पण्णत्ते ।
125
