________________
ज्ञाताधर्मकथा
एवं खल जंबू ! तेणं कालेणं तेणं समएणं रायगिहे णयरे जाव गोयमसामी समणं भगवं महावीरं एवं वयासी-कहं णं भंते ! जीवा वड्ढति वा हायति वा ? गोयमा ! से जहाणामए बहुलपक्खस्स पडिवया-चंदे, पुण्णिमा-चंदं पणिहाय हीणे वण्णेणं हीणे सोम्मए हीणे णिद्धयाए हीणे कंतीए एवं दित्तीए जुत्तीए छायाए पभाए ओयाए लेस्साए मंडलेणं । तयाणंतरं च णं बिइयाचंदे, पाडिवयं-चंदं पणिहाय हीणतराए वण्णेणं जाव हीणतराए मंडलेणं । तयाणंतरं च णं तइया-चंदे, बिइया-चंदं पणिहाय हीणतराए वण्णेणं जाव हीणतराए मंडलेणं। एवं खल एएणं कमेणं परिहायमाणे-परिहायमाणे जाव अमावसा-चंदे, चाउद्दसिचंदं पणिहाय णढे वण्णेणं जाव णढे मंडलेणं । एवामेव समणाउसो ! जो अम्हं णिग्गंथो वा णिग्गंथी वा जाव पव्वइए समाणे हीणे खंतीए एवं मुत्तीए, गुत्तीए, अज्जवेणं, मद्दवेणं, लाघवेणं, सच्चेणं, तवेणं, चियाए, अकिंचणयाए, हीणे बंभचेरवासेणं। तयाणंतरं च णं हीणे हीणतराए खंतीए जाव हीणतराए बंभचेरवासेणं | एवं खलु एएणं कमेणं परिहीयमाणे परिहीयमाणे णडे खंतीए जाव णडे बंभचेरवासेणं । जहा से सुक्कपक्खस्स पाडिवया-चंदे अमावासा-चंदं पणिहाय अहिए वण्णेणं जाव अहिए मंडलेणं । तयाणंतरं च णं बिइया-चंदे पडिवया-चंदं पणिहाय अहियतराए वण्णेणं जाव अहियतराए मंडलेणं | एवं खल एएणं कमेणं परिवड्ढेमाणे-परिवड्ढेमाणे जाव पण्णिमा-चंदे चाउद्दसिं चंदं पणिहाय पडिपुण्णे वण्णेणं जाव पडिपुण्णे मंडलेण । एवामेव समणाउसो ! जो अम्हं णिगंथो वा णिगंथी वा जाव पव्वइए समाणे अहिए खंतीए जाव अहिए बंभचेरवासेणं। तयाणंतरं च णं अहियतराए खंतीए जाव अहियतराएबंभचेरवासेणं । एवं खलु एएणं कमेणं परिवड्ढेमाणे-परिवड्ढेमाणे पडिपुण्णे खंतीए जाव पडिपुण्णे बंभचेरवासेणं । एवं खलु गोयमा ! जीवा वड्ढंति वा हायंति वा । एवं खलु जंबू ! समणेणं भगवया महावीरेणं दसमस्स णायज्झयणस्य अयमढे पण्णत्ते । || त्ति बेमि ||
ट।
|
9
॥ दसमं अज्झयणं समत्तं ||
122
