________________
४३
४४
४५
४६
४७
४८
४९
भगवई सुत्त
गोयमा ! ताहे चेवं णं से सक्के देविंदे देवराया ईसाणस्स देविंदस्स देवरण्णो अंतियं पाउब्भवइ, ईसाणे वा देविंदे देवराया सक्क्स्स देविंदस्स देवरण्णो अंतियं पाउब्भवइ - इति भो सक्का देविंदा देवराया दाहिणड्ढलोगा - हिवई ! इति भो ईसाणा देविंदा देवराया उत्तरड्ढ लोगाहिवई ! इति भो ! इति भो ! त्ति ते अण्णमण्णस्स किच्चाई, करणिज्जाइं पच्चणुब्भवमाणा विहरंति ।
अत्थि णं भंते ! तेसिं सक्कीसाणाणं देविंदाणं देवराईणं विवादा समुप्पज्जंति ? हंता अत्थि | से कहमियाणिं पकरेंति ?
गोयमा! ताहे चेव णं ते सक्कीसाणा देविंदा देवरायाणो सणकुमारं देविंदं देवरायं मणसीकरेंति । तएणं से सणंकुमारे देविंदे देवराया तेहिं सक्कीसाणेहिं देविंदेहिं देवराईहिं मणसीकए समाणे खिप्पामेव सक्कीसाणाणं देविंदाणं देवराईणं अंतियं पाउब्भवइ, जं से वयइ तस्स आणा उववाय वयण णिद्देसे चिट्ठति ।
सणंकुमारे णं भंते ! देविंदे देवराया किं भवसिद्धिए ? अभवसिद्धिए ? सम्मदिट्ठी ? मिच्छदिट्ठी? परित्तसंसारए ? अनंतसंसारए ? सुलभबोहिए ? दुल्लभबोहिए ? आराहए ? विराहए ? चरिमे ? अचरिमे ?
गोयमा ! सणकुमारे णं देविंदे देवराया भवसिद्धिए, णो अभवसिद्धिए । एवं सम्मदिट्ठि, परित्तसंसारए, सुलभबोहिए, आराहए, चरिमे, पसत्थं णेयव्वं ।
से केणद्वेणं भंते ! एवं ?
गोयमा ! सणकुमारे देविंदे देवराया बहूणं समणाणं, बहूणं समणीणं बहूणं सावयाणं बहूणं सावियाणं हियकामए सुहकामए पत्थकामए आणुकंपिए णिस्सेयसिएहिय-सुह-णिस्सेयसकामए से तेणट्ठेणं गोयमा ! सणकुमारे णं भवसिद्धिए जाव णो अचरिमे ।
सणंकुमारस्स णं भंते ! देविंदस्स देवरण्णो केवइयं कालं ठिई पण्णत्ता ? गोयमा ! सत्त सागरोवमाणि ठिई पण्णत्ता ।
से णं भंते ! ताओ देवलोगाओ आउक्खएणं जाव कहिं उववज्जिहिइ ? गोयमा ! महाविदेहे वासे सिज्झिहिइ जाव अंतं करेहिइ ॥ सेवं भंते ! सेवं भंते ! ॥
छट्ठट्ठममासो अद्धमासो, वासाइं अट्ठ छम्मासा । तीसग-कुरुदत्ताणं, तव भत्तपरिण्णा परियाओ ||
उच्चत्त विमाणाणं, पाउब्भव पेच्छणा य संलावे ।
किच्च विवादुप्पत्ती, सणकुमारे य भवियत्तं ॥ मोया सम्मत्ता ॥
॥ पढमो उद्देशो समत्तो ॥
74
