________________
भगवई सुत्त पासावच्चिज्जा थेरा भगवंतो समणोवासएहिं इमाइं एयारूवाइं वागरणाइं पुच्छिया- संजमे णं भंते ! किं फले, तवे किं फले ? तं चेव जाव सच्चे णं एसमडे, णो चेव णं आयभाववत्तव्वयाए ।
तं पभू णं भंते ! ते थेरा भगवंतो तेसिं समणोवासयाणं इमाइं एयारूवाइं वागरणाइं वागरेत्तए, उदाहू अप्पभू ? समिया णं भंते ! ते थेरा भगवंतो तेसिं समणोवासयाणं इमाइ एयारूवाइं वागरणाइं वागरित्तए, उदाहु असमिया ? आउज्जिया णं भंते ! ते थेरा भगवंतो तेसिं समणो- वासयाणं इमाइं एयारूवाइं वागरणाई वागरेत्तए, उदाहु अणाउज्जिया? पलिउज्जिया णं भंते ! ते थेरा भगवंतो तेसिं समणोवासयाणं इमाइं एयारूवाइं वागरणाइं वागरेत्तए, उदाहु अपलिउज्जिया? पुव्वतवेणं अज्जो ! देवा देवलोएसु उवज्जंति । पुव्वसंजमेणं, कम्मियाए संगियाए अज्जो ! देवा देवलोएस् उववज्जति, सच्चे णं एसमढे, णो चेव णं आयभाववत्तव्वयाए । पभू णं गोयमा ! ते थेरा भगवंतो तेसिं समणोवासयाणं इमाइं एयारूवाइं वागरणाइं वागरेत्तए, णो चेव णं अप्पभू । तह चेव णेयव्वं अविसेसियं जाव सच्चे णं एसमढे णो चेव णं आयभाववत्तव्वयाए। अहं पि णं गोयमा ! एवमाइक्खामि भासेमि पण्णवेमि परूवेमि- पुव्वतवेणं देवा देवलोएसु उववज्जंति, पुव्वसंजमेणं देवा देवलोएसु उववज्जंति, कम्मियाए देवा देवलोएसु उववज्जंति, संगियाए देवा देवलोएसु उववज्जंति, पुव्वतवेणं, पुव्वसंजमेणं, कम्मियाए, संगियाए अज्जो! देवा देवलोएसु उववज्जंति, सच्चे णं एसमढे णो चेव णं आयभाववत्तव्वयाए। तहारूवं णं भंते ! समणं वा माहणं वा पज्जुवासमाणस्स किं फला पज्जुवासणा ? गोयमा ! सवणफला ।
से णं भंते ! सवणे किंफले ? णाणफले ।
.
से णं भंते ! णाणे किंफले ? विण्णाणफले ।
णं भंते ! विण्णाणे किंफले ? पच्चक्खाणफले ।
से णं भंते ! पच्चक्खाणे किंफले ? संजमफले ।
से णं भंते ! संजमे किंफले ? अणण्हयफले ।
से णं भंते ! अणण्हए किं फले ? तवफले ।
से णं भंते ! तवे किं फले ? वोदाणफले ।
से णं भंते ! वोदाणे किं फले ? अकिरियाफले ।
से णं भंते ! अकिरिया किं फला ? सिद्धिपज्जवसाणफला पण्णत्ता गोयमा !
