________________
३३
३४
३५
१
भगवई सुत्त
सलेस्सा णं भंते! जीवा अकिरियावाई किं भवसिद्धिया, पुच्छा ? गोयमा ! भवसिद्धिया वि, अभवसिद्धिया वि । एवं अण्णाणियवाई वि, वेणइयवाई वि । जहा सलेस्सा, एवं जाव सुक्कलेसा ।
अलेस्सा णं भंते! जीवा किरियावाई किं भवसिद्धिया, पुच्छा ?
गोयमा ! भवसिद्धिया, णो अभवसिद्धिया । एवं एएणं अभिलावेणं कण्हपक्खिया तिसु वि समोसरणेसु भयणाए । सुक्कपक्खिया चउसु वि समोसरणेसु भवसिद्धिया, णो अभवसिद्धिया । सम्मदिट्ठी जहा अलेस्सा । मिच्छादिट्ठी जहा कण्हपक्खिया । सम्मामिच्छदिट्ठी दोसु वि समोसरणेसु जहा अलेस्सा। णाणी जाव केवलणाणी भवसिद्धिया, णो अभवसिद्धिया । अण्णाणी जाव विभंगणाणी जहा कण्हपक्खिया । सण्णासु चउसु वि जहा सलेस्सा । णो सण्णोवउत्ता जहा सम्मदिट्ठी । सवेयगा जाव णपुंसगवेयगा जहा सलेस्सा । अवेयगा जहा सम्मदिट्ठी । सकसायी जाव लोभकसायी जहा सलेस्सा । अकसायी जहा सम्मदिट्ठी । सजोगी जाव कायजोगी जहा सलेस्सा । अजोगी जहा सम्मदिट्ठी । सागारोवउत्ता अणागारोवउत्ता जहा सलेस्सा |
एवं णेरइया वि भाणियव्वा णवरं - णायव्वं जं अत्थि । एवं असुरकुमारा वि जाव थणियकुमारा। पुढविक्काइया सव्वट्ठाणेसु वि मज्झिल्लेसु दोसु वि समोसरणेसु भवसिद्धिया वि, अभवसिद्धिया वि । एवं जाव वणस्सइकाइया ।
बेइंदिय-तेइंदिय-चउरिंदिया एवं चेव, णवरं सम्मत्ते, ओहिणाणे, आभिणिबोहियणाणे, सुयणाणे एएस चेव दोसु मज्झिमेसु समोसरणेसु भवसिद्धिया, णो अभवसिद्धिया, सेसं तं चेव । पंचिंदियतिरिक्खजोणिया जहा णेरड्या, णवरं णायव्वं जं अत्थि । मणुस्सा जहा ओहियाजीवा। वाणमंतर-जोइसिय-वेमाणिया जहा असुरकुमारा ||सेवं भंते! सेवं भंते ! ||
॥ पढमो उद्देसो समत्तो ॥
तीसइमं सतं
२-११ उद्देसो
अणंतरोववण्णगा णं भंते ! णेरइया किं किरियावाई, पुच्छा ? गोयमा ! किरियावाई वि वेणइयवाई वि ।
सलेस्सा णं भंते ! अणंतरोववण्णगा णेरइया किं किरियावाई, पुच्छा ? गोयमा ! एवं चेव, एवं जहेव पढमुद्देसे णेरइयाणं वत्तव्वया तहेव इह वि भाणियव्वा, णवरं- जं जस्स अत्थि अणंतरोववण्णगाणं णेरइयाणं तं तस्स भाणियव्वं । एवं सव्वजीवाणं जाव वेमाणियाणं, णवरंअणंतरोववण्णगाणं जं जहिं अत्थि तं तहिं भाणियव्वं ।
किरियावाई णं भंते ! अणंतरोववण्णगा णेरड्या किं णेरइयाउयं पकरेंति, पुच्छा? गोयमा! णो णेरइयाउयं पकरेंति, णो तिरिक्खजोणियाउयं, णो मणुस्साउयं, णो देवाउयं पकरेंति । एवं अकिरियावाई वि अण्णाणियवाई वि वेणइयवाई वि ।
608
