Page Text
________________
भगवई सुत्त
११७
से किं तं भंते! भिक्खायरिया ? गोयमा ! भिक्खायरिया अणेगविहा पण्णत्ता, तं जहादव्वाभिग्गहचरए, एवं जहा उववाइए जाव सुद्धसणिए, संखादत्तिए | से तं भिक्खायरिया। से किं तं भंते! रसपरिच्चाए ? गोयमा ! रसपरिच्चाए अणेगविहे पण्णत्ते, तं जहाणिव्विगिइए, पणीयरसविवज्जए, एवं जहा उववाइए जाव लूहाहारे । से तं रसपरिच्चाए | से किं तं भंते ! कायकिलेसे ? गोयमा ! कायकिलेसे अणेगविहे पण्णत्ते, तं जहा- ठाणाईए, उक्कुड्यासणिए, एवं जहा उववाइए जाव सव्वगायपरिकम्म-विभूसविप्पमुक्के। से तं कायकिलेसे । से किं तं भंते ! पडिसंलीणया ? गोयमा ! पडिसंलीणया चउव्विहा पण्णत्ता, तं जहा- इंदिय पडिसंलीणया, कसायपडिसंलीणया, जोगपडिसलीणया, विवित्तसयणासणसेवणया। से किं तं भंते! इंदियपडिसलीणया ? गोयमा! इंदियपडिसलीणया पंचविहा पण्णत्ता, तं जहासोइंदियविसयप्पयारणिरोहो वा, सोइंदियविसयप्पत्तेसु वा अत्थेसु रागदोस- विणिग्गहो, चक्खिंदियविसयप्पयारणिरोहो एवं जाव फासिंदियविसयप्पयारणिरोहो वा फासिंदियविसयप्पत्तेसु वा अत्थेसु रागदोसविणिग्गहो । से तं इंदियपडिसंलीणया | से किं तं भंते ! कसायपडिसंलीणया ? गोयमा ! कसायपडिसंलीणया चउव्विहा पण्णत्ता, तं जहा- कोहोदयणिरोहो वा उदयप्पत्तस्स वा कोहस्स विफलीकरणं | एवं जाव लोभोदयणिरोहो वा उदयप्पत्तस्स वा लोभस्स विफलीकरणं । से तं कसायपडिसंलीणया। से किं तं भंते ! जोगपडिसंलीणया ? गोयमा ! जोगपडिसंलीणया तिविहा पण्णत्ता, तं जहामणजोगपडिसंलीणया, वइजोगपडिसलीणया, कायजोगपडिसंलीणया । से किं तं भंते! मणजोगपडिसंलीणया ? गोयमा! मणजोगपडिसलीणया तिविहा पण्णत्ता पण्णत्ता, तं जहा- अकुसलमणणिरोहो वा कुसलमणउदीरणं वा मणस्स वा एगत्तीभावकरणं। से किं तं भंते! वइजोगपडिसलीणया ? गोयमा! वइजोगपडिसलीणया तिविहा पण्णत्ता, तं जहा- अकुसलवइणिरोहो वा कुसलवइउदीरणं वा वइए वा एगत्तीभावकरणं। से किं तं कायजोगपडिसलीणया ? कायजोगपडिसलीणया जण्णं सुसमाहियपसंतसाहरियपाणियाए कुम्मो इव गुत्तिंदिए अल्लीणे पल्लीणे चिट्ठइ, से तं कायपडिसंलीणया । से तं जोगपडिसलीणया । से किं तं विवित्तसयणासणसेवणया ? विवित्तसयणासणसेवणया जण्णं आरामेस् वा उज्जाणेसु वा जहा सोमिलुद्देसए जाव सेज्जासंथारगं उवसंपज्जित्ता णं विहरइ । से त्तं विवितसयणासणसेवणया । से तं पडिसलीणया । से तं बाहिरए तवे | से किं तं भंते ! अन्भिंतरए तवे ? गोयमा ! अब्भिंतरए तवे छव्विहे पण्णत्ते, तं जहापायच्छित्तं, विणओ, वेयावच्चं, सज्झाओ, झाणं, विउसग्गो ।
१२३
से किं तं भंते! पायच्छित्ते ? गोयमा! पायच्छित्ते दसविहे पण्णत्ते, तं जहा- आलोयणारिहे जाव पारंचियारिहे। से तं पायच्छित्ते ।
591
| SR No. | 009905 |
| Book Title | Agam 05 Ang 05 Bhagvati Vyakhya Prajnapti Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 653 |
| Language | Prakrit |
| Classification | Book_Devnagari, Agam, Canon, & agam_bhagwati |
| File Size | 8 MB |