________________
भगवई सुत्त
जइ भंते ! अवेयए किं उवसंतवेयए, खीणवेयए होज्जा ? गोयमा ! उवसंतवेयए वा, खीणवेयए
वा होज्जा । १५ | जइ भंते ! सवेयए होज्जा किं इत्थिवेयए, पुच्छा | गोयमा ! तिसु वि जहा बउसो।
णियंठे णं भंते ! किं सवेयए, पुच्छा | गोयमा ! णो सवेयए होज्जा, अवेयए होज्जा । जइ भंते ! अवेयए होज्जा किं उवसंतवेयए, पुच्छा । गोयमा ! उवसंतवेयए वा होज्जा, खीणवेयए वा होज्जा । सिणाए णं भंते ! किं सवेयए होज्जा, पुच्छा ? गोयमा ! जहा णियंठे तहा सिणाए वि, णवरंणो उवसंतवेयए होज्जा, खीणवेयए होज्जा | पुलाए णं भंते ! किं सरागे होज्जा, वीयरागे होज्जा ? गोयमा ! सरागे होज्जा, णो वीयरागे होज्जा, एवं जाव कसायकुसीले । णियंठे णं भंते ! किं सरागे होज्जा, पुच्छा | गोयमा ! णो सरागे होज्जा, वीयरागे होज्जा । जइ भंते ! वीयरागे होज्जा किं उवसंतकसायवीयरागे होज्जा, खीणकसायवीयरागे होज्जा ? गोयमा ! उवसंतकसायवीयरागे वा होज्जा, खीणकसायवीयरागे वा होज्जा। सिणाए एवं चेव, णवरं- णो उवसंतकसायवीयरागे होज्जा, खीणकसायवीयरागे होज्जा | पुलाए णं भंते ! किं ठियकप्पे होज्जा, अद्वियकप्पे होज्जा ? गोयमा ! ठियकप्पे वा होज्जा, अट्ठियकप्पे वा होज्जा | एवं जाव सिणाए । पुलाए णं भंते ! किं जिणकप्पे होज्जा, थेरकप्पे होज्जा, कप्पाईए होज्जा ? गोयमा ! णो जिणकप्पे होज्जा, थेरकप्पे होज्जा, णो कप्पाईए होज्जा । बउसे णं भंते ! ? गोयमा ! जिणकप्पे वा होज्जा, थेरकप्पे वा होज्जा, णो कप्पाईए होज्जा। एवं पडिसेवणाकुसीले वि । कसायकुसीले णं भंते ! पुच्छा ? गोयमा ! जिणकप्पे वा होज्जा, थेरकप्पे वा होज्जा, कप्पाईए वा होज्जा । णियंठे णं भंते ! पुच्छा ? गोयमा ! णो जिणकप्पे होज्जा, णो थेरकप्पे होज्जा, कप्पाईए होज्जा। एवं सिणाए वि । पुलाए णं भंते ! किं सामाइयसंजमे होज्जा, छेओवट्ठावणियसंजमे होज्जा, परिहारविसुद्धियसंजमे होज्जा, सुहुमसंपरायसंजमे होज्जा, अहक्खायसंजमे होज्जा ? गोयमा ! सामाइयसंजमे वा होज्जा, छेओवट्ठावणियसंजमे वा होज्जा, णो परिहारविसुद्धिय-संजमे होज्जा, णो सुहुमसंपरायसंजमे होज्जा, णो अहक्खायसंजमे होज्जा। एवं बउसे वि, एवं पडिसेवणाकुसीले वि । कसायकुसीले णं भंते ! पुच्छा ? गोयमा ! सामाइयसंजमे वा होज्जा जाव सुहमसंपरायसंजमे वा होज्जा, णो अहक्खायसंजमे होज्जा ।
२८)
570
