________________
भगवई सुत्त लोगागाससेढीओ णं भंते! किं साइयाओ सपज्जवसियाओ, पुच्छा ? गोयमा ! साइयाओ सपज्जवसियाओ, णो साइयाओ अपज्जवसियाओ, णो अणाइयाओ सपज्जवसियाओ, णो अणाइयाओ अपज्जवसियाओ | एवं जाव उड़ढमहाययाओ । अलोगागाससेढीओ णं भंते ! किं साइयाओ सपज्जवसियाओ, पृच्छा ? गोयमा! सिय साइयाओ सपज्जवसियाओ, सिय साइयाओ अपज्जवसियाओ, सिय अणाइयाओ सपज्जवसियाओ, सिय अणाइयाओ अपज्जवसियाओ। पाईणपडीणाययाओ दाहिणुत्तराययाओ य एवं चेव, णवरं-णो साइयाओ सपज्जवसियाओ, सिय साइयाओ अपज्जवसियाओ, सेसं तं चेव । उड्ढमहाययाओ जहा ओहियाओ तहेव चउभंगो | सेढीओ णं भंते ! दव्वट्ठयाए किं कडजुम्माओ, पुच्छा ? गोयमा ! कडजुम्माओ, णो तेओगाओ, णो दावरजुम्माओ, णो कलिओगाओ । एवं जाव उड्ढमहाययाओ | लोगागाससेढीओ एवं चेव। एवं अलोगागाससेढीओ वि |
सेढीओ णं भंते ! पएसट्टयाए किं कडजुम्माओ, पुच्छा ? गोयमा ! एवं चेव । एवं जाव उड्ढमहाययाओ । लोगागाससेढीओ णं भंते ! पएसट्ठयाए, पुच्छा ? गोयमा ! सिय कडजुम्माओ, णो तेओयाओ, सिय दावरजुम्माओ, णो कालिओगाओ | एवं पाईणपडीणाययाओ वि, दाहिणुत्तराययाओ वि । उड्ढमहाययाओ णं भंते ! सेढीओ पएसट्टयाए, पुच्छा ? गोयमा ! कडजुम्माओ, णो तेओयाओ, णो दावरजुम्माओ, णो कलिओगाओ । अलोगागाससेढीओ णं भंते ! पएसट्ठयाए, पच्छा ? गोयमा ! सिय कडजुम्माओ जाव सिय कलिओगाओ । एवं पाईणपडीणाययाओ वि | एवं दाहिणुत्तराययाओ वि | उड्ढमहाययाओ वि एवं चेव। णवरं णो कलिओगाओ। सेसं तं चेव । कई णं भंते! सेढीओ पण्णत्ताओ ? गोयमा! सत्त सेढीओ पण्णत्ताओ, तं जहा- उज्जआयया, एगओवंका, दुहओवंका, एगओखहा, दुहओखहा, चक्कवाला, अद्धचक्कवाला | परमाणुपोग्गलाणं भंते ! किं अणुसेढिं गई पवत्तइ, विसेढिं गई पवत्तइ ? गोयमा ! अणुसेढिं गई पवत्तइ, णो विसेढिं गई पवत्तइ । दुपएसियाणं भंते ! खंधाणं अणुसेढिं गई पवत्तइ, विसेढिं गई पवत्तइ ? गोयमा ! एवं चेव । एवं जाव अणंतपएसियाणं खंधाणं । णेरइयाणं भंते! किं अणुसेढिं गई पवत्तइ, विसेढिं गई पवत्तइ ? गोयमा! एवं चेव। एवं जाव वेमाणियाणं । इमीसे णं भंते ! रयणप्पभाए पुढवीए केवइया णिरयावाससयसहस्सा पण्णत्ता ? गोयमा ! तीसं णिरयावाससयसहस्सा पण्णत्ता । एवं जहा पढमसए पंचमुद्देसए जाव अणुत्तर-विमाण त्ति । कइविहे णं भंते ! गणिपिडए पण्णत्ते ? गोयमा ! दवालसंगे गणिपिडए पण्णत्ते, तं जहाआयारो जाव दिद्विवाओ |
552
