________________
८
९
१०
११
१२
१३
१४
१५
१६
भगवई सुत्त
लोगस्स णं भंते ! एगम्मि आगासपएसे कइ दिसिं पोग्गला चिज्जंति ? गोयमा ! णिव्वाघाएणं छद्दिसिं, वाघायं पडुच्च सिय तिदिसिं, सिय चउदिसिं, सिय पंचदिसिं ।
लोगस्स णं भंते ! एगम्मि आगासपएसे कइदिसिं पोग्गला छिज्जंति ? गोयमा ! एवं चेव, एवं उवचिज्जंति, एवं अवचिज्जंति ?
जीवे णं भंते ! जाई दव्वाइं ओरालियसरीरत्ताए गेण्हइ ताइं किं ठियाई गेण्हइ, अठियाई गेण्हइ ? गोयमा ! ठियाइं पि गेण्हइ, अठियाई पि गेहइ |
ताइं भंते! किं दव्वओ गेण्हइ, खेत्तओ गेण्हइ, कालओ गेण्हइ, भावओ गेण्हइ ? गोयमा ! दव्वाओ वि गेण्हइ, खेत्ताओ वि गेण्हइ, कालओ वि गेण्हइ, भावओ वि गेण्हइ । ताइ दव्वओ अणंतपएसियाइं दव्वाइं, खेत्तओ असंखेज्जपएसोगाढाई एवं जहा पण्णवणाए पढमे आहारुद्देस जाव णिव्वाघाएणं छद्दिसिं, वाघायं पडुच्च सिय तिदिसिं, सिय चउदिसिं, सिय पंचदिसिं ।
जीवे णं भंते ! जाई दव्वाइं वेउव्वियसरीरत्ताए गेण्हइ ताई किं ठियाई गेण्हइ, अठियाई गेहइ? गोयमा ! एवं चेव, णवरं नियमं छद्दिसिं, एवं आहारग सरीरत्ताए वि ।
जीवे णं भंते ! जाई दव्वाइं तेयगसरीरत्ताए गेहइ, पुच्छा ? गोयमा ! ठियाइं गेण्हइ, णो अठियाइं गेण्हइ, सेसं जहा ओरालियसरीरस्स । कम्मगसरीरे एवं चेव । एवं जाव भावओ वि गिण्हइ ।
जीवे णं भंते ! जाई दव्वाइं दव्वओ गेहइ ताइं किं एगपएसियाई गेण्हइ, दुपएसियाइं गेण्हइ ? गोयमा ! जहा भासापए जाव आणुपुव्विं गेण्हइ, णो अणाणुपुव्विं गेण्हइ ।
ताइं भंते ! कइदिसिं गेण्हइ ? गोयमा ! एवं जाव णिव्वाघाएणं जहा ओरालियस्स ।
जीवे णं भंते ! जाई दव्वाइं सोइंदियत्ताए गेण्हइ, पुच्छा ? गोयमा ! जहा वेउव्वियसरीरं । एवं जाव जिब्भिंदियत्ताए । फासिंदियत्ताए जहा ओरालियसरीरं । मणजोगत्ताए जहा कम्मगसरीरं, णवरं- णियमं छद्दिसिं, एवं वइजोगत्ताए वि । कायजोगत्ताए जहा ओरालियसरीरस्स ।
जीवे णं भंते ! जाई दव्वाइं आणापाणुत्ताए गेण्हइ, पुच्छा ? गोयमा ! जहेव ओरालियसरीरत्ताए जाव सिय पंचदिसिं । केइ चउवीसदंडएणं एयाणि पयाणि भण्णंति-जस्स जं अत्थि । ॥ सेवं भंते! सेवं भंते ! ॥
॥ बीओ उद्देसो समत्तो ॥
पंचवीसइमं सतं
तइओ उद्देस
कइ णं भंते ! संठाणा पण्णत्ता ? गोयमा ! छ संठाणा पण्णत्ता, तं जहा- परिमंडले, वट्टे, तंसे, चउरंसे, आयते, अणित्थंथे ।
546
