________________
भगवई सुत्त
चउवीसइमं सतं
चोद्दसमो उद्देसो
तेउक्काइया णं भंते ! कओहिंतो उववज्जंति ? गोयमा ! पुढविक्काइयउद्देसगसरिसो उद्देसो भाणियव्वो, णवरं-ठिइं संवेहं च जाणेज्जा, देवेहिंतो ण उववज्जंति, सेसं तं चेव। || सेवं भंते ! सेवं भंते ! ||
|| चोद्दसमो उद्देसो समत्तो ||
चउवीसइमं सतं
पण्णरसमो उद्देसो
वाउक्काइया णं भंते ! कओहिंतो उववज्जंति, पुच्छा ? गोयमा ! एवं जहेव तेउक्काइयउद्देसओ तहेव, णवरं- ठिइं संवेहं च जाणेज्जा || सेवं भंते ! सेवं भंते ! ||
॥ पण्णरसमो उद्देसो समत्तो ||
चउवीसइमं सतं
सोलसमो उद्देसो
वणस्सइकाइया णं भंते ! कओहिंतो उववज्जंति ? गोयमा ! पढविक्काइयसरिसो उद्देसो, णवरं- जाहे वणस्सइकाइओ वणस्सइ- काइएस् उववज्जइ ताहे पढम-बिइय-चउत्थ-पंचमेसु गमएसु परिमाणं- अणुसमयं अविरहियं अणंता उववज्जति। भवादेसेणं जहण्णेणं दो भवग्गहणाई, उक्कोसेणं अणंताई भवग्गहणाइं। कालादेसेणं जहण्णेणं दो अंतोमुहुत्ता, उक्कोसेणं अणंतं कालं जाव एवइयं कालं गइरागइं करेज्जा | सेसा पंच गमा अट्ठभवग्गहणिया तहेव, णवरं- ठिइं संवेहं च जाणेज्जा । || सेवं भंते ! सेवं भंते ! ||
|| सोलसमो उद्देसो समत्तो ॥
चउवीसइमं सतं
सत्तरसमो उद्देसो
बेइंदिया णं भंते ! कओहिंतो उववज्जंति ? जाव पुढविक्काइए णं भंते ! जे भविए बेइंदिएस उववज्जित्तए से णं भंते ! केवइयकालठिईएसु उववज्जेज्जा ? गोयमा ! सच्चेव पुढविकाइयस्स लद्धी जाव भवादेसेणं जहण्णेणं दो भवग्गहणाई, उक्कोसेणं संखेज्जाइं भवग्गहणाई, कालादेसेणं जहण्णेणं दो अंतोमुहुत्ता, उक्कोसेणं संखेज्ज कालं जाव एवइयं कालं गइरागइं करेज्जा । एवं तेसु चेव चउसु गमएसु संवेहो, सेसेसु पंचसु तहेव अट्ठ भवा । एवं जाव चरिंदिएणं समं चउसु संखेज्जा भवा, पंचसु अट्ठ भवा ।
526
