________________
४
भगवई सुत्त
लद्धी णिरवसेसा णवसु गमएसु, णवरं- णागकुमारट्ठिइं संवेहं च जाणेज्जा । ॥ सेवं भंते ! सेवं भंते ! ॥
॥ तइओ उद्देसो समत्तो ॥
चवीसइमं सतं
४-११ उद्देसो
अवसेसा सुवण्णकुमाराणं जाव थणियकुमारा एए अट्ठ वि उद्देसगा जहेव नागकुमारा णिरवसेसा भाणियव्वा । ॥ सेवं भंते ! सेवं भंते ! ॥
॥ ४-११ उद्देसो समत्तो ॥
चवीसइमं सतं
दुवालसमो उद्देसो
पुढविक्काइया णं भंते! कओहिंतो उवज्जंति, किं णेरइएहिंतो उववज्जंति, तिरिक्ख जोणियमणुस्स-देवेहिंतो उववज्जंति ? गोयमा ! णो णेरइएहिंतो उववज्जंति, तिरिक्खजोणिय- मणुस्सदेवेहिंतो वि उववज्जंति ।
जइ णं भंते! तिरिक्खजोणिएहिंतो उववज्जंति, किं एगिंदियतिरिक्खजोणिएहिंतो उववज्जंति, पुच्छा ? गोयमा ! जहा वक्कंतीए उववाओ जाव जइ बायर- पुढविक्काइय-एगिंदियतिरिक्खजोणिएहिंतो उववज्जंति, किं पज्जत्तबायर पुढवि जाव उववज्जंति, अपज्जत्तबादरपुढवि जाव उववज्जंति ? गोयमा! पज्जत्तबादरपुढवी वि, अपज्जत्तबादरपुढवी वि उववज्जति ।
पुढविक्काइए णं भंते ! जे भविए पुढविक्काइएस उववज्जित्तए से णं भंते ! केवइयकालट्ठिईएसु उववज्जेज्जा ? गोयमा ! जहण्णेणं अंतोमुहुत्तट्ठिईएसु, उक्कोसेणं बावीसवाससहस्सट्ठिईएसु उववज्जेज्जा |
ते णं भंते! जीवा एगसमएणं केवइया उववज्जंति ?
गोयमा ! अणुसमयं अविरहिया असंखेज्जा उववज्जंति । छेवट्टसंघयणी । सरीरो- गाहणा जहण्णेणं अंगुलस्स असंखेज्जइभागं, उक्कोसेणं वि अंगुलस्स असंखेज्जइभागं । मसूराचंदासंठिया । चत्तारि लेस्साओ । णो सम्मदिट्ठी, मिच्छादिट्ठी, णो सम्मामिच्छादिट्ठी । णो णाणी, अण्णाणी, दो अण्णाणा नियमं । णो मणजोगी, णो वइजोगी, कायजोगी । उवओगो दुविहो वि। चत्तारि सण्णाओ । चत्तारि कसाया । एगे फासिंदिए पण्णत्ते । तिण्णि समुग्धाया। वेयणा दुविहा । णो इत्थीवेयगा, णो पुरिसवेयगा, णपुंसगवेयगा । ठिईए जहण्णेणं अंतोमुहुत्तं, उक्कोसेणं बावीसं वाससहस्साइं । अज्झवसाणा पसत्था वि, अप्पसत्था वि। अणुबंधो जहा ठिई ।
517
