________________
भगवई सुत्त
बावीसइमं सतं बावीसइमं वग्गो : १-१० उद्देसा
०
ताले-गट्ठिय-बहुबीयगा य, गुच्छा य गुम्म वल्ली य । छद्दस वग्गा एए, सद्धिं पुण होंति उद्देसा || रायगिहे जाव एवं वयासी- अह भंते ! ताल-तमाल-तक्कलि-तेतलि-साल-सरला- सारगल्लाणं जाव केयइ-कदलि-कंदलि-चम्मरुक्ख-गुंदरुक्ख-हिंगुरुक्ख-लवंगरुक्ख-पूयफल-खज्जूरि-णालिएरीणं एएसि णं जे जीवा मूलत्ताए वक्कमंति, ते णं भंते ! जीवा कओहिंतो उववज्जंति ? गोयमा ! एत्थ वि मूलादीया दस उद्देसगा कायव्वा जहेव सालीणं, णवरं इमं णाणत्तं- मूले कंदे खंदे तयाए साले य एएस् पंचसु उद्देसगेसु देवो ण उववज्जइ । तिण्णि लेसाओ । ठिई जहण्णेणं अंतोमुहुत्तं, उक्कोसेणं दसवास-सहस्साई । उवरिल्लेसु पंचसु उद्देसएसु देवो उववज्जइ । चत्तारि लेसाओ। ठिई जहण्णेणं अंतोमुहुत्तं, उक्कोसेणं वासपुहुत्तं | ओगाहणा मूले कंदे धणुहपुहत्तं, खंधे तयाए साले य गाउयपुहुत्तं, पवाले पत्ते धणुपुहुत्तं, पुप्फे हत्थपुहुत्तं, फले बीए य अंगुलपुहुत्तं । सव्वेहिं जहण्णेणं अंगुलस्स असंखेज्जइभाग। सेसं जहा सालीणं । एवं एए दस उद्देसगा ।
बावीसइमं सतं
बीओ वग्गो : १-१० उद्देसा
अह भंते ! णिबंब-जंबु-कोसंब-ताल-अंकोल्ल-पीलु-सेलु-सल्लइ-मोयइ- मालुय-बउल- पलासकरंज-पुत्तंजीवग-रिदृ-बिहेडग-हरियग-भल्लाय-उंबरिया-खीरणि-धायई-पियालपूइयणिंबायग(करंज) सेण्हय-पासिय-सीसव-असण-पुण्णाग-णागरुक्ख-सीवण्ण-असोगाणं एएसि णं जे जीवा मूलत्ताए वक्कमंति, पुच्छा ? गोयमा ! एवं मूलादीया दस उद्देसगा कायव्वा णिरवसेसं जहा तालवग्गो ।
बावीसइमं सतं
तइओ वग्गो : १-१० उद्देसा
अह भंते ! अत्थिय-तिंदुय-बोर-कविट्ठ-अंबाडग-माउलिंग-बिल्ल-आमलग-फणस-दाडिम- आसत्थउंबर - वड - णग्गोह- णंदिरुक्ख- पिप्पलि - सतर - पिलक्खुरुक्ख - काउंबरिय - कुच्छंभरिय-देवदालि-तिलगलउय-छत्तोह-सिरीस-सत्तवण्ण-दहिवण्ण-लोद्ध-धव-चंदण-अज्जुणणीव-कुडुग-कलंबाणं एएसि णं जे जीवा मूलत्ताए वक्कमंति, पुच्छा ? गोयमा ! एत्थ वि मूलादीया दस उद्देसगा तालवग्गसरिसा णेयव्वा ।
बावीसइमं सतं
497
