________________
भगवई सुत्त एवं सुहुमतेउकाइयस्स वि ।१८-१९-२०| एवं सुहुमआउक्काइयस्स वि ।२१-२२-२३। एवं सुहुमपुढविकाइयस्स वि ।२४-२५-२६। एवं बायरवाउकाइयस्स वि ।२७-२८-२९। एवं बायरतेउकाइयस्स वि ।३०-३१-३२। एवं बायरआउकाइयस्स वि ।३३-३४-३५। एवं बायरपुढविकाइयस्स वि |३६-३७-३८। एएसिं सव्वेसिं तिविहेणं गमेणं भाणियव्वं । बायरणिगोयस्स पज्जत्तगस्स जहण्णिया ओगाहणा असंखेज्जगुणा ।३९। तस्स चेव अपज्जत्तगस्स उक्कोसिया ओगाहणा विसेसाहिया ।४०। तस्स चेव पज्जत्तगस्स उक्कोसिया ओगाहणा विसेसाहिया ।४१| पत्तेयसरीरबायरवणस्सइकाइयस्स पज्जत्तगस्स जहण्णिया ओगाहणा असंखेज्जगुणा ।४२। तस्स चेव अपज्जत्तगस्स उक्कोसिया ओगाहणा असंखेज्जगुणा ।४३। तस्स चेव पज्जत्तगस्स उक्कोसिया ओगाहणा असंखेज्जगुणा ।४४। एयस्स णं भंते ! पुढविकाइयस्स आउक्काइयस्स तेउकाइयस्स वाउक्काइयस्स वणस्सइकाइयस्स कयरे काए सव्वसुहुमे कयरे काए सव्वसुहुमतराए ? गोयमा ! वणस्सइकाए सव्वसुहुमे, वणस्सइकाए सव्वसुहुमतराए | एयस्स णं भंते ! पुढविकाइयस्स आउक्काइयस्स तेउकाइयस्स वाउक्काइयस्स कयरे काए सव्वसुहुमे, कयरे काए सव्व सुहुमतराए ? गोयमा ! वाउक्काए सव्वसुहुमे, वाउक्काए सव्वसुहुमतराए । एयस्स णं भंते ! पुढविकाइयस्स आउक्काइयस्स तेउकाइयस्स कयरे काए सव्वसुहमे, कयरे काए सव्वसुहुमतराए ? गोयमा ! तेउकाए सव्वसुहुमे, तेउक्काए सव्वसुहुमतराए। एयस्स णं भंते ! पुढविक्काइयस्स आउक्काइयस्स कयरे काए सव्वसुहमे, कयरे काए सव्वसुहुमतराए ? गोयमा! आउक्काए सव्वसुहुमे, आउक्काए सव्व सुहुमतराए | एयस्स णं भंते ! पुढविक्काइयस्स आउकाइयस्स तेउकाइयस्स वाउकाइयस्स वणस्सइकाइयस्स कयरे काए सव्वबादरे, कयरे काए सव्वबादर-तराए ? गोयमा ! वणस्सइकाए सव्वबादरे, वणस्सइकाए सव्वबादरतराए | एयस्स णं भंते ! पुढविकाइयस्स आउक्काइयस्स तेउक्काइयस्स वाउक्काइयस्स कयरे काए सव्वबादरे, कयरे काए सव्वबादरतराए ? गोयमा ! पुढविक्काए सव्वबादरे, पुढविक्काए सव्वबादरतराए | एयस्स णं भंते ! आउक्काइयस्स तेउक्काइयस्स वाउकाइयस्स कयरे काए सव्वबायरे, कयरे काए सव्वबायरतराए ? गोयमा ! आउक्काए सव्वबादरे, आउक्काए सव्वबायरतराए | एयस्स णं भंते ! तेउकाइयस्स वाउक्काइयस्स कयरे काए सव्वबायरे, कयरे काए सव्वबायरतराए? गोयमा ! तेउकाय सव्वबायरे, तेउक्काए सव्वबायरतराए ।
463
