Page Text
________________
भगवई सुत्त
|
६
गोयमा ! णो इणढे समढे, णो खलु तत्थ सत्थं कमइ । एवं जहा पंचमसए परमाणुपोग्गल वत्तव्वया जाव अणगारे णं भंते ! भावियप्पा उदावत्तं जाव णो खलु तत्थ सत्थं कमइ । परमाणुपोग्गले णं भंते ! वाउकाएणं फुडे, वाउकाए वा परमाणु-पोग्गलेणं फुडे ? गोयमा ! परमाणुपोग्गले वाउकाएणं फुडे, णो वाउयाए परमाणुपोग्गलेणं फुडे | दुप्पएसिए णं भंते! खंधे, पुच्छा ? गोयमा ! एवं चेव । एवं जाव असंखेज्ज-पएसिए | अणंतपएसिए णं भंते ! खंधे, पुच्छा | गोयमा ! अणंतपएसिए खंधे वाउयाएणं फुडे, वाउयाए अणंत-पएसिएणं खंधेणं । वत्थी भंते ! वाउकाएणं फुडे, वाउकाए वत्थिणा फुडे ? गोयमा ! वत्थी वाउयाएणं फुडे, णो वाउयाए वत्थिणा फुडे | अत्थि णं भंते! इमीसे रयणप्पभाए पुढवीए अहे दव्वाइं वण्णओ काल-णील-लोहिय-हालिद्दसुक्किल्लाइं गंधओ सुब्भिगंधाइं, दुब्भिगंधाइं, रसओ तित्त-कडुय-कसाय-अंबिल-महुराई, फासओ कक्कड-मउय-गरुय-लय-सीय-उसिण-णिद्ध लुक्खाइं, अण्णमण्णबद्धाइं, अण्णमण्णपुट्ठाइं जाव अण्णमण्णघडत्ताए चिट्ठति? गोयमा! हंता अत्थि। एवं जाव अहेसत्तमाए। अत्थि णं भंते ! सोहम्मस्स कप्पस्स अहे, पुच्छा ? गोयमा ! एवं चेव । एवं जाव ईसिपब्भाराए पुढवीए । सेवं भंते ! सेवं भंते ! जाव विहरइ । तएणं समणे भगवं महावीरे जाव बहिया जणवयविहारं विहरइ । तेणं कालेणं तेणं समएणं वाणियगामे णामं णयरे होत्था, वण्णओ | दूइपलासए चेइए, वण्णओ। तत्थ णं वाणियगामे णयरे सोमिले णामं माहणे परिवसइ, अड्ढे जाव अपरिभूए | रिउव्वेद जाव सुपरिणिहिए, पंचण्हं खंडियसयाणं, सयस्स कुटुंबस्स आहेवच्चं जाव विहरइ । तए णं समणे भगवं महावीरे जाव समोसढे जाव परिसा पज्जुवासइ । तए णं तस्स सोमिलस्स माहणस्स इमीसे कहाए लद्धहस्स समाणस्स अयमेयारूवे अज्झत्थिए जाव समुप्पज्जित्था- एवं खलु समणे णायपुत्ते पुव्वाणुपुव्विं चरमाणे गामाणुगामं दूइज्जमाणे सुहंसुहेणं जाव इहमागए जाव दूइपलासए चेइए अहापडिरूवं जाव विहरइ । तं गच्छामि णं समणस्स णायपुत्तस्स अंतियं पाउब्भवामि, इमाइं च णं एयारूवाइं अट्ठाइं जाव वागरणाई पुच्छिस्सामि, तं जड़ मे से इमाइं एयारूवाइं अट्ठाइं जाव वागरणाइं वागरेहिइ तओ णं वंदीहामि णमंसीहामि जाव पज्जुवासीहामि। अह मे से इमाइं अट्ठाइं जाव वागरणाइं णो वागरेहिइ तो णं एएहिं चेव अढेहि य जाव वागरणेहि य णिप्पट्ठपसिणवागरणं करेस्सामि त्ति कट्ट एवं संपेहेइ, संपेहेत्ता बहाए जाव विभूसिय सरीरे, साओ गिहाओ पडिणिक्खमइ, पडिणिक्खमित्ता पायविहारचारेणं एगेणं खंडियसएणं सद्धिं संपरिवुडे वाणियगामं णयरं मज्झमज्झेणं णिग्गच्छइ, णिग्गच्छित्ता जेणेव दुइपलासए चेइए जेणेव समणे भगवं महावीरे तेणेव उवागच्छइ, उवागच्छित्ता समणस्स भगवओ महावीरस्स अदूरसामंते ठिच्चा समणं भगवं महावीरं एवं वयासी
457
| SR No. | 009905 |
| Book Title | Agam 05 Ang 05 Bhagvati Vyakhya Prajnapti Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 653 |
| Language | Prakrit |
| Classification | Book_Devnagari, Agam, Canon, & agam_bhagwati |
| File Size | 8 MB |