Page Text
________________
भगवई सुत्त
८
तएणं से कत्तिए सेट्ठी विपुलं असणं जाव साइमं एवं जहा गंगदत्तो तहा मित्तणाइ जाव परिजणेणं जेट्टपुत्तेणं णेगमट्ठसहस्सेण य समणुगम्ममाणमग्गे सव्वड्ढीए जाव रवेणं हत्थिणापुरं णयरं मज्झंमज्झेणं जहा गंगदत्तो जाव आलित्ते णं भंते ! लोए, पलित्ते णं भंते! लोए, आलित्तपलित्ते णं भंते ! लोए जाव आणुगामियत्ताए भविस्सइ, तं इच्छामि णं भंते! णेगमट्ठसहस्सेण सद्धिं सयमेव पव्वावियं जाव धम्ममाइक्खियं । तएणं मुणिसुव्वए अरहा कत्तियं सेटिं णेगमट्ठसहस्सेणं सद्धिं सयमेव पव्वावेइ जाव धम्ममाइक्खइ- एवं देवाणुप्पिया ! गंतव्वं, एवं चिट्ठियव्वं जाव संजमियव्वं । तए णं से कत्तिए सेट्ठी णेगमट्ठसहस्सेण सद्धिं मुणिसुव्वयस्स अरहओ इमं एयारूवं धम्मियं उवदेसं सम्म पडिवज्जइ, तमाणाए तहा गच्छड़ जाव संजमेइ । तएणं से कत्तिए सेट्ठी णेगमट्ठसहस्सेणं सद्धिं अणगारे जाए- ईरियासमिए जाव गुत्तबंभयारी | तएणं से कत्तिए अणगारे मुणिसुव्वयस्स अरहओ तहारूवाणं थेराणं अंतियं सामाइयमाइयाइं चोद्दस पुव्वाई अहिज्जइ, अहिज्जित्ता बहुहिं चउत्थ छट्ठ-दुम जाव अप्पाणं भावेमाणे बहुपडिपुण्णाई दुवालस वासाइं सामाण्ण-परियागं पाउणइ, पाउणित्ता मासियाए संलेहणाए अत्ताणं झोसेइ, झोसित्ता सद्धिं भत्ताई अणसणाए छेदेइ, छेदेत्ता आलोइय पडिकंते कालमासे कालं किच्चा सोहम्मे कप्पे सोहम्मवडेंसए विमाणे उववायसभाए देवसयणिज्जंसि जाव सक्के देविंदत्ताए उववण्णे | तए णं से सक्के देविंदे देवराया अहणोववण्णमित्तए सेसं जहा गंगदत्तस्स जाव सव्व दुक्खाणं अंतं काहिइ, णवरं ठिई दो सागरोवमाइं, सेसं तं चेव ॥ सेवं भंते ! सेवं भंते ! ||
|| बीओ उद्देसो समत्ता ||
अट्ठारसमं सतं
तइओ उद्देसो
तेणं कालेणं तेणं समएणं रायगिहे णयरे होत्था, वण्णओ । गुणसीलए चेइए, वण्णओ | सामी समोसरिए जाव परिसा पडिगया | तेणं कालेणं तेणं समएणं समणस्स भगवओ महावीरस्स अंतेवासी मागंदियपत्ते णामं अणगारे पगइभद्दे, जहा मंडियपत्ते जाव पज्जवासमाणे एवं वयासी
से णूणं भंते ! काउलेस्से पुढविकाइए काउलेस्सेहिंतो पुढविकाइएहितो अणंतरं उव्वट्टित्ता माणुसं विग्गहं लभइ, लभित्ता केवलं बोहिं बुज्झइ, बुज्झित्ता तओ पच्छा सिज्झइ जाव सव्व दुक्खाणं अंतं करेइ? हंता मागंदियपुत्ता ! काउलेस्से पुढविकाइए जाव सव्व दुक्खाणं अंतं करेइ । से णूणं भंते ! काउलेसे आउकाइए काउलेसेहिंतो आउकाइएहितो अणंतरं उव्वट्टित्ता माणुसं विग्गहं लभइ, लभित्ता केवलं बोहिं बुज्झइ जाव सव्व दुक्खाणं अंतं करेइ ? हंता मागंदियपुत्ता! जाव सव्व दुक्खाणं अंतं करेइ । से णूणं भंते! काउलेस्से वणस्सइकाइए, पुच्छा ? गोयमा! एवं चेव जाव अंतं करेइ ।
442
| SR No. | 009905 |
| Book Title | Agam 05 Ang 05 Bhagvati Vyakhya Prajnapti Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 653 |
| Language | Prakrit |
| Classification | Book_Devnagari, Agam, Canon, & agam_bhagwati |
| File Size | 8 MB |