________________
४
५
२
13
18
19
भगवई सुत्त
गोयमा! सव्वत्थोवा दीवकुमारा तेउलेस्सा, काउलेस्सा असंखेज्जगुणा, णीललेस्सा विसेसाहिया, कण्हलेस्सा विसेसाहिया ।
एएसिं णं भंते ! दीवकुमाराणं कण्हलेसाणं जाव तेउलेस्साण य कयरे कयरेहिंतो अप्पिड्ढिया वा महिड्ढिया वा ?
गोयमा ! कण्हलेस्साहितो णीललेस्सा महिढिया जाव सव्वमहिड्ढिया तेउलेस्सा ॥ सेवं भंते ! सेवं भंते ! ॥
उदहिकुमाराणं णं भंते! सव्वे समाहारा, पुच्छा ?
गोयमा ! एवं चेव । एवं दिसाकुमाराण वि, थणियकुमाराण वि । उद्देसगो भाणियव्वो एवं एए तिण्णि उद्देसगा ।
॥ ११-१४ उद्देसो समत्ता ॥
॥ सोलसमं सतं समत्त ॥
सत्तरसमं सतं
पढमो उद्देसो
कुंजर संजय सेलेसिं, किरिय ईसाण पुढवि दग वाऊ । एगिंदिय णाग सुवण्ण, विज्जु वायु अग्गि सत्तरसे ॥
रायगिहे जाव एवं वयासी- उदायी णं भंते ! हत्थि राया कओहिंतो अणंतरं उव्वट्टित्ता उदायिहत्थिरायत्ताए उववण्णे ?
गोयमा ! असुरकुमारेहिंतो देवेहिंतो अणंतरं उव्वट्टित्ता उदायि-हत्थि-रायत्ताए उववण्णे ।
उदायी णं भंते ! हत्थिराया कालमासे कालं किच्चा कहिं गच्छिहिइ, कहिं उववज्जिहिइ ? गोयमा ! इमीसे रयणप्पभाए पुढवीए उक्कोसं सागरोवमट्ठिइयंसि णिरयावासंसि णेरइयत्ता उववज्जिहिइ ।
से णं भंते ! तओहिंतो अणंतरं उव्वट्टित्ता कहिं गच्छिहिइ, कहिं उववज्जिहिइ ?
गोयमा ! महाविदेहे वासे सिज्झिहिइ जाव अंतं काहिइ ।
भूयाणंदे णं भंते ! हत्थिराया कओहिंतो अणंतरं उव्वट्टित्ता भूयाणंदे हत्थिरायत्ताए उववण्णे ? गोयमा ! जहेव उदायी जाव अंतं काहिइ |
पुरिसे णं भंते ! तालमारुहइ, तालमारुहित्ता तालाओ तालफलं पचालेमाणे वा पवाडेमाणे वा किरिए ?
427
