________________
१
R
४
७
८
18
१०
भगवई सुत्त
चोद्दसमं सतं
तइओ उद्देस
देवे णं भंते ! महाकाए महासरीरे अणगारस्स भावियप्पणो मज्झमज्झेणं वीइवएज्जा ? गोयमा! अत्थेगइए वीइवएज्जा, अत्थेगइए णो वीइवएज्जा ।
से केणद्वेणं भंते! एवं वच्चइ- अत्थेगइए वीइवएज्जा, अत्थेगइए णो वीइवएज्जा ? गोयमा ! दुविहा देवा पण्णत्ता तं जहा- मायिमिच्छादिट्ठीउववण्णगा य अमायिसम्मदिट्ठीउववण्णगा य, तत्थ णं जे से मायिमिच्छादिट्ठीउववण्णए देवे से णं अणगारं भावियप्पाणं पासइ, पासित्ता णो वंदइ, णो णमंसइ, णो सक्कारेइ, णो सम्माणेइ, णो कल्लाणं मंगलं देवयं चेइयं जाव पज्जुवासइ, से णं अणगारस्स भावियप्पणो मज्झमज्झेणं वीइवएज्जा । तत्थ णं जे से अमायिसम्मद्दिट्ठिउववण्णए देवे से णं अणगारं भावियप्पाणं पासइ पासित्ता वंद, णमंसइ जाव पज्जुवासइ । से णं अणगारस्स भावियप्पणो मज्झंमज्झेणं णो वीइवएज्जा, से तेणट्ठेणं गोयमा ! एवं वुच्चइ जाव अत्थेगइए णो वीइवएज्जा । असुरकुमारे णं भंते! महाकाये महासरीरे अणगारस्स भावियप्पणो मज्झंमज्झेणं वीइवएज्जा ? गोयमा! एवं चेव, देवदंडओ भाणियव्वो जाव वेमाणिए ।
अत्थि णं भंते ! णेरइयाणं सक्कारे इ वा, सम्माणे इ वा, किइकम्मे इ वा अब्भुट्ठाणे इ वा, अंजलिपग्गहे इ वा; आसणाभिग्गहे इ वा आसणाणुप्पदाणे इ वा, एंतस्स पच्चुग्गच्छणया, ठियस्स पज्जुवासणया, गच्छंतस्स पडिसंसाहणया ? गोयमा ! णो इणट्ठे समट्ठे ।
अत्थि णं भंते ! असुरकुमाराणं सक्कारे इ वा, सम्माणे इ वा जाव गच्छंतस्स पडिसंसाहणया? हंता अत्थि । एवं जाव थणियकुमाराणं । पुढविकाइयाणं जाव चउरिंदियाणं एएसिं जहा रइयाणं ।
अत्थि णं भंते ! पंचिंदियतिरिक्खजोणियाणं सक्कारे इ वा जाव गच्छंतस्स पडिसंसाहणया ? हंता अत्थि, णो चेव णं आसणाभिग्गहे इ वा, आसणाणुप्पदाणे इवा । मणुस्साणं जाव वेमाणियाणं जहा असुरकुमाराणं ।
अप्पिड्ढीए णं भंते ! देवे महिड्ढीयस्स देवस्स मज्झंमज्झेणं वीइवएज्जा ? गोयमा ! णो इणट्ठे समट्ठे ।
समिड्ढीए णं भंते ! देवे समिड्ढीयस्स देवस्स मज्झं मज्झेणं वीइवएज्जा ? गोयमा! णो इट्ठे समट्ठे, पमत्तं पुण वीइवज्जा |
से णं भंते ! किं सत्थेणं अक्कमित्ता पभू, अणक्कमित्ता पभू ? गोयमा ! अक्कमित्ता पभू, णो अणक्कमित्ता पभू ।
से णं भंते ! किं पुव्विं सत्थेणं अक्कमित्ता पच्छा वीइवएज्जा, पुव्विं वीइवएज्जा पच्छा सत्थेणं अक्कमेज्जा ?
370
