________________
भगवई सुत्त गोयमा ! जहा असुरकुमाराणं जाव अणंतखुत्तो, णो चेव णं देवित्ताए, एवं सव्वजीवा वि । एवं जाव आरणच्चुएसु । अयं णं भंते ! जीवे तिसु वि अट्ठारसुत्तरेसु गेविज्जविमाणावासेसु पुच्छा ? गोयमा ! एवं चेव जहा सणंकुमारेसु । अयं णं भंते ! जीवे पंचसु अणुत्तरविमाणेसु एगमेगंसि अणुत्तरविमाणंसि पुच्छा ? गोयमा ! तहेव जाव असई वा अणंतखुत्तो, णो चेव णं देवत्ताए वा देवित्ताए वा, एवं सव्वजीवा वि । अयं णं भंते ! जीवे सव्वजीवाणं माइत्ताए, पिइत्ताए, भाइत्ताए, भगि- णित्ताए, भज्जत्ताए, पुत्तत्ताए, धूयत्ताए, सुण्हत्ताए उववण्णपुव्वे ? हंता गोयमा ! असई, अदुवा अणंतखुत्तो । सव्वजीवा वि णं भंते ! इमस्स जीवस्स माइत्ताए जाव उववण्णपुव्वा ? हंता गोयमा ! असइं अदुवा अणंतखुत्तो। अयं णं भंते! जीवे सव्वजीवाणं अरित्ताए, वेरियत्ताए, घायगत्ताए, वहगत्ताए, पडिणीयत्ताए, पच्चामित्तत्ताए उववण्णपुव्वे ? हंता गोयमा ! असई अदुवा अणंतखुत्तो। सव्वजीवा वि णं भंते इमस्स जीवस्स अरित्तए जाव उववण्णपुव्वा ! हंता गोयमा ! असइं अदुवा अणंतखुत्तो । अयं णं भंते ! जीवे सव्वजीवाणं रायत्ताए, जुवरायत्ताए जाव सत्थवाहत्ताए उववण्णपुव्वे ? हंता गोयमा ! असइं अदुवा अणंतखुत्तो । सव्वजीवाणं एवं चेव । अयं णं भंते ! जीवे सव्वजीवाणं दासत्ताए, पेसत्ताए, भयगत्ताए, भाइल्लगत्ताए, भोगपुरिसत्ताए, सीसत्ताए, वेसत्ताए उववण्णपुव्वे ? हंता गोयमा ! असई अदुवा अणंतखुत्तो। एवं सव्वजीवा वि अणंतखुत्तो। || सेवं भंते! सेवं भंते॥
॥ सत्तमो उद्देसो समत्तो ||
अट्ठमो उद्देसो
तेणं कालेणं तेणं समएणं जाव एवं वयासी- देवे णं भंते ! महिडढीए जाव महासोक्खे अणंतरं चयं चइत्ता बिसरीरेसु णागेसु उववज्जेज्जा ? हंता गोयमा ! उववज्जेजा |
२
से णं तत्थ अच्चिय - वंदिय - पइय - सक्कारिय - सम्माणिए दिव्वे सच्चे सच्चोवाए सण्णिहियपाडिहरे यावि भवेज्जा ?
332
