________________
भगवई सुत्त
पुढविक्काइयाणं पुच्छा । गोयमा ! ओरालिय, तेयगाइं पडुच्च पंचवण्णा जाव अट्ठफासा पण्णत्ता; कम्मगं पडुच्च जहा णेरड्याणं; जीवं पडुच्च तहेव । एवं जाव चरिंदिया; णवरं वाउक्काइया ओरालिय, वेउव्विय, तेयगाइं पडुच्च पंचवण्णा जाव अट्ठफासा पण्णत्ता; सेसं जहा णेरइयाणं । पंचिंदियतिरिक्खजोणिया जहा वाउक्काइया । मणुस्साणं भंते ! पुच्छा ? गोयमा ! ओरालिय-वेउव्विय-आहारग-तेयगाइं पडुच्च पंचवण्णा जाव अट्ठफासा पण्णत्ता; कम्मगं, जीवं च पडुच्च जहा णेरइयाणं | वाणमंतर- जोइसिय-वेमाणिया जहा पेरइया । धम्मत्थिकाए जाव जीवत्थिकाए; एए सव्वे अवण्णा जाव अफासा। पोग्गलत्थिकाए पंचवण्णे, पंचरसे, दुगंधे, अट्ठफासे पण्णत्ते । णाणावरणिज्जे जाव अंतराइए; एयाणि चउफासाणि | कण्हलेसा णं भंते ! कइवण्णा जाव कइ फासा पण्णत्ता । गोयमा ! दव्वलेसं पड़च्च पंचवण्णा जाव अट्ठफासा पण्णत्ता; भावलेसं पड़च्च अवण्णा अगंधा, अरसा अफासा | एवं जाव सुक्कलेस्सा | सम्मद्दिहि मिच्छादिट्ठी सम्मामिच्छादिट्ठी चक्खइंसणे अचखुदंसणे ओहिदंसणे केवलदंसणे आभिणिबोहियणाणे जाव विभंगणाणे; आहारसण्णा जाव परिग्गहसण्णा; एयाणि अवण्णाणि अगंधाणि, अरसाणि अफासाणि । ओरालियसरीरे जाव तेयगसरीरे; एयाणि अट्ठफासाणि । कम्मगसरीरे चउफासे | मणजोगे, वयजोगे य चउफासे; कायजोगे अट्ठफासे | सागारोवओगे य अणगारोवओगे य अवण्णा जाव अफासा ।। सव्वदव्वा णं भंते ! कइवण्णा जाव कइफासा पण्णत्ता । गोयमा ! अत्थेगइया सव्वदव्वा पंचवण्णा जाव अट्ठफासा पण्णत्ता; अत्थेगइया सव्वदव्वा पंचवण्णा जाव चउफासा पण्णत्ता; अत्थेगइया सव्वदव्वा एगवण्णा एगगंधा एगरसा दुफासा पण्णत्ता; अत्थेगइया सव्वदव्वा अवण्णा जाव अफासा पण्णत्ता । एवं सव्वपएसा वि, सव्वपज्जवा वि । तीयद्धा अवण्णा जाव अफासा पण्णत्ता । एवं अणागयता वि | एवं सव्वद्धा वि । जीवे णं भंते ! गब्भं वक्कममाणे कइवण्णं, कइगंधं, कइरसं, कइफासं परिणामं परिणमइ ? गोयमा ! पंचवण्णं, पंचरसं, दुगंधं, अट्ठफासं परिणाम परिणमइ। कम्मओ णं भंते ! जीवे विभत्तिभावं परिणमइ णो अकम्मओ ? कम्मओ णं जगे विभत्तिभावं परिणमइ णो अकम्मओ ? हंता गोयमा ! कम्मओ णं जीवे विभत्तिभावं परिणमइ, णो अकम्मओ विभत्तिभावं परिणमइ। एवं जगे वि || सेवं भंते ! सेवं भंते ! ||
|| पचंमो उद्देसो समत्तो ||
॥ एक्कारसं सतं समत्तं ॥
327
