Page Text
________________
१५
१६
१७
१८
१९
भगवई सुत्त
अहेलोय-खेत्तलोयस्स णं भंते ! एगम्मि आगासपएसे किं जीवा, जीवदेसा, जीवप्पएसा; अजीवा, अजीवदेसा, अजीवपएसा ?
गोयमा ! णो जीवा, जीवदेसा वि जीवपएसा वि; अजीवा वि अजीवदेसा वि अजीवपएसा वि । जे जीवदेसा ते णियमा एगिंदिय देसा, अहवा एगिंदियदेसा य बेइंदियस्स देसे, अहवा एगिंदियदेसा य बेइंदियाण य देसा । एवं मज्झिल्ल - विरहिओ जाव अहवा एगिंदियदेसा य अणिदियदेसाय |
जे जीवपएसा ते णियमा एगिंदियपएसा; अहवा एगिंदियपएसा य बेइंदियस्स परसा, अहवा एगिंदियपएसा य बेइंदियाण य पएसा, एवं आइल्लविरहिओ जाव पंचिंदिएसु, अणिदिएस तियभंगो । जे अजीवा ते दुविहा पण्णत्ता, तंजहा- रूवी अजीवा य अरूवी अजीवा य । रूवी तहेव, जे अरूवी अजीवा ते पंचविहा पण्णत्ता, तंजहा- णो धम्मत्थिकाए धम्मत्थिकायस् देसे, धम्मत्थिकायस्स पएसे, एवं अहम्मत्थिकायस्स वि, अद्धासमए ।
तिरियलोयखेत्तलोयस्स णं भंते! एगम्मि आगासपएसे किं जीवा, पुच्छा ?
गोयमा ! जहा अहोलोयखेत्तलोयस्स तहेव । एवं उड्ढलोयखेत्तलोयस्स वि, णवरं अद्धासमओ णत्थि, अरूवी चउव्विहा । लोयस्स जहा अहोलोयखेत्तलोयस्स एगम्मि आगासपएसे ।
अलोयस्स णं भंते ! एगंमि आगासपएसे किं जीवा, पुच्छा ?
गोयमा ! णो जीवा, णो जीवदेसा, तं चेव जाव अणंतेहिं अगरुयलहुय गुणेहिं संजुत् सव्वागासस्स अणंतभागूणे ।
दव्वओ णं अहेलोयखेत्तलोए अणंताइं जीवदव्वाइं, अणंताइं अजीवदव्वाई, अनंता जीवाजीवदव्वा । एवं तिरियलोयखेत्तलोए वि । एवं उड्ढलोयखेत्तलोए वि । दव्वओ णं अलोए णवत्थि जीवदव्वा णेवत्थि अजीवदव्वा णेवत्थि जीवाजीवदव्वा, एगे अजीवदव्वदेसे जाव सव्वागासअणंतभागूणे । कालओ णं अहेलोयखेत्तलोए - ण कयाइ णासि जाव णिच्चे । एवं जाव अलोए । भावओ णं अहेलोयखेत्तलोए अणंता वण्णपज्जवा, एवं जहा खंदए जाव अणंता अगरुयलहुयपज्जवा, एवं जाव लोए । भावओ णं अलोए णेवत्थि वण्णपज्जवा जाव णेवत्थि गरुयलहुयपज्जवा, एगे अजीवदव्वदेसे जाव अनंतभागणे ।
लोए णं भंते! के महालए पण्णत्ते ?
गोयमा ! अयण्णं जंबुद्दीवे दीवे सव्वदीव समुद्दाणं सव्वब्भंतराए जाव परिक्खेवेणं । तेणं कालेणं तेणं समएणं छ देवा महिड्ढीया जाव महासोक्खा; जंबुद्दीवे दीवे मंदरे पव्वए मंदरचूलियं सव्वओ समंता संपरिक्खित्ता णं चिट्ठेज्जा, अहे णं चत्तारि दिसाकुमारीओ महत्तरियाओ चत्तारि बलिपिंडे गहाय जंबुद्दीवस्स दीवस्स चउसु वि दिसासु बहिया अभिमुहीओ ठिच्चा ते चत्तारि बलिपिंडे जमगसमगं बहियाभिमुहे पक्खिवेज्जा, पभू णं गोयमा ! तओ एगमेगे देवे ते चत्तारि बलिपिंडे धरणितलमसंपत्ते खिप्पामेव पडिसाहरित्तए, ते णं गोयमा ! देवा ता उक्किट्ठाए जाव देवगईए एगे देवे पुरत्थाभिमुहे पयाए । एवं दाहिणाभिमुहे । एवं पच्चत्थिमाभिमुहे, एवं उत्तराभिमुहे । एवं उड्ढाभिमुहे एवं अहोभिमुहे पयाए । तेणं कालेणं तेणं समएणं
294
| SR No. | 009905 |
| Book Title | Agam 05 Ang 05 Bhagvati Vyakhya Prajnapti Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 653 |
| Language | Prakrit |
| Classification | Book_Devnagari, Agam, Canon, & agam_bhagwati |
| File Size | 8 MB |