________________
भगवई सुत्त
अभवसिद्धियाणं भंते ! किं णाणी, अण्णाणी ? गोयमा ! णो णाणी, अण्णाणी; तिण्णि अण्णाणाई भयणाए ।
णोभवसिद्धिया णोअभवसिद्धिया णं भंते ! जीवा किं णाणी अण्णाणी ? गोयमा ! जहा सिद्धा |
सण्णीणं भंते ! जीवा णाणी, अण्णाणी ? गोयमा ! जहा सइंदिया । असण्णी जहा बेइंदिया । णोसण्णी णोअसण्णी जहा सिद्धा ।
कइविहा णं भंते ! लद्धी पण्णत्ता ? गोयमा! दसविहा लद्धी पण्णत्ता, तं जहा- णाण लद्धी, दंसणलद्धी, चरित्तलद्धी, चरित्ताचरित्तलद्धी, दाणलद्धी, लाभलद्धी, भोगलद्धी, उवभोगलद्धी, वीरियलद्धी, इंदियलद्धी ।
णाणलद्धी णं भंते ! कइविहा पण्णत्ता ? गोयमा ! पंचविहा पण्णत्ता, तं जहाआभिणिबोहिय- णाणलद्धी जाव केवलणाणलद्धी ।
अण्णाणलद्धी णं भंते ! कइविहा पण्णत्ता ? गोयमा ! तिविहा पण्णत्ता, तं जहामइअण्णाणलद्धी, सुयअण्णाणलद्धी, विभंगणाणलद्धी । दंसणलद्धी णं भंते ! कइविहा पण्णत्ता ? गोयमा ! तिविहा पण्णत्ता, तं जहासम्मदंसणलद्धी, मिच्छादसणलद्धी, सम्मामिच्छादंसणलद्धी । चरित्तलद्धी णं भंते ! कइविहा पण्णत्ता ? गोयमा ! पंचविहा पण्णत्ता, तं जहासामाइयचरित्तलद्धी छेओवट्ठावणिय-चरित्तलद्धी, परिहारविसुद्धचरित्तलद्धी, सुहुमसंपरायचरित्तलद्धी, अहक्खाय-चरित्तलद्धी ।
चरित्ताचरित्तलद्धी णं भंते ! कइविहा पण्णत्ता | गोयमा ! एगागारा पण्णत्ता। एवं जाव उवभोगलद्धी एगागारा पण्णत्ता ।
वीरियलद्धी णं भंते ! कइविहा पण्णत्ता ? गोयमा ! तिविहा पण्णत्ता, तं जहाबालवीरियलद्धी, पंडियवीरियलद्धी, बालपंडियवीरियलद्धी । इंदियलद्धी णं भंते ! कइविहा पण्णत्ता ? गोयमा ! पंचविहा पण्णत्ता, तं जहा- सोइंदियलद्धी जाव फासिंदियलद्धी ।।
णाणलद्धिया णं भंते ! जीवा किं णाणी, अण्णाणी ? गोयमा ! णाणी, णो अण्णाणी । अत्थेगइया दुण्णाणी एवं पंच णाणाइं भयणाए । तस्स अलद्धिया णं भंते ! जीवा किं णाणी, अण्णाणी ? गोयमा ! णो णाणी, अण्णाणी । अत्थेगइया दुअण्णाणी, अत्थेगइया तिअण्णाणी, तिण्णि अण्णाइं भयणाए । आभिणिबोहियणाणलद्धिया णं भंते! जीवा किं णाणी, अण्णाणी ? गोयमा ! णाणी, णो अण्णाणी । अत्थेगइया दुण्णाणी-तिण्णाणी-चउणाणी, चत्तारि णाणाइं भयणाए |
191
