________________
भगवई सुत्त जाव अण्णमण्णघडत्ताए चिटुंति; एवामेव एगमेगस्स जीवस्स बहूहिं आजाइसहस्सेहिं बहूइं आउयसहस्साइं आणुपुव्विगढियाइं जाव चिट्ठति। एगे वि य णं जीवे एगेणं समएणं एगं आउयं पडिसंवेदेइ । तं जहा- इहभवियाउयं वा, परभवियाउयं वा; जं समयं इहभवियाउयं पडिसंवेदेइ णो तं समयं परभवियाउयं पडिसंवेदेड, जं समयं परभवियाउयं पडिसंवेदेड णो तं समयं इहभवियाउयं पडिसंवेदेइ; इहभवियाउयस्स पडिसंवेयणाए णो परभवियाउयं पडिसंवेदेइ, परभवियाउयस्स पडिसंवेयणाए णो इहभवियाउयं पडिसंवेदेइ। एवं खलु एगे जीवे एगेणं समएणं एग आउयं पडिसंवेदेइ, तं जहा- इहभवियाउयं वा, परभवियाउयं वा ।
जीवे णं भंते ! जे भविए णेरइएस् उववज्जित्तए से णं किं साउए संकमइ, णिराउए संकमइ?
गोयमा ! साउए संकमइ, णो णिराउए संकमइ । से णं भंते ! आउए कहिं कडे, कहिं समाइण्णे ? गोयमा ! पुरिमे भवे कडे, पुरिमे भवे समाइण्णे । एवं जाव वेमाणियाणं दंडओ | से णणं भंते ! जे भविए जं जोणिं उववज्जित्तए से तमाउयं पकरेड, तं जहा- णेरड्याउयं वा जाव देवाउयं वा ? हंता गोयमा ! जे भविए जं जोणिं उववज्जित्तए से तमाउयं पकरेइ, तं जहा- णेरइयाउयं वा, तिरि-मण-देवाउयं वा । णेरइयाउयं पकरेमाणे सत्तविहं पकरेइ, तं जहारयणप्पभापुढवीणेरइयाउयं वा जाव अहेसत्तमापुढवीणेरइयाउयं वा । तिरिक्खजोणियाउयं पकरेमाणे पंचविहं पकरेइ, तं जहा- एगिदियतिरिक्ख- जोणियाउयं वा जाव पंचिंदियतिरिक्खजोणियाउयं वा [भेओ सव्वो भाणियव्वो ।] एवं मणुस्साउयं दुविहं, देवाउयं चउव्विहं पकरेइ । || सेवं भंते ! सेवं भंते ! ||
|| तइओ उद्देसो समत्तो ||
चउत्थो उद्देसो
छउमत्थे णं भंते ! मणुस्से आउडिज्जमाणाइं सद्दाइं सुणेइ ? तं जहा- संखसद्दाणि वा सिंगसद्दाणि वा संखियसद्दाणि वा खरमहीसद्दाणि वा, पोयासद्दाणि वा पिरिपिरियासद्दाणि वा पणवसद्दाणि वा पडहसद्दाणि वा भंभासदाणि वा होरंभ-सद्दाणि वा भेरिसद्दाणि वा झल्लरीसद्दाणि वा दुंदुभिसद्दाणि वा तताणि वा वितताणि वा घणाणि वा झुसिराणि वा ? हंता गोयमा ! छउमत्थे णं मणुस्से आउडिज्जमाणाइं सद्दाइं सुणेइ, तं जहा- संखसद्दाणि वा जाव झुसिराणि वा। ताइं भंते ! किं पुट्ठाइं सुणेइ, अपुट्ठाइं सुणेइ ? गोयमा ! पुट्ठाइं सुणे; णो अपुट्ठाइं सुणेइ जाव णियमा छद्दिसिं सुणेइ । छउमत्थे णं भंते! मणूसे किं आरगयाइं सद्दाइं सुणेइ, पारगयाइं सद्दाइं सुणेइ ? गोयमा! आरगयाइं सद्दाइं सुणेइ, णो पारगयाइं सद्दाइं सुणेइ ।
105
