________________
भगवई सुत्त
णवमो उद्देसो
रायगिहे जाव एवं वयासी- कइविहे णं भंते ! इंदियविसए पण्णत्ते ?
गोयमा ! पंचविहे इंदियविसए पण्णत्ते, तं जहा- सोइंदियविसए जाव जीवाभिगमे जोइसिय उद्देसओ णेयव्वो अपरिसेसो ।
| णवमो उद्देशो समत्तो ||
दसमो उद्देसो
रायगिहे जाव एवं वयासी-चमरस्स णं भंते ! असुरिंदस्स असुररण्णो कइ परिसाओ पण्णत्ताओ?
गोयमा ! तओ परिसाओ पण्णत्ताओ, तं जहा- समिया, चंडा, जाया, एवं जहाणपव्वीए जाव अच्चुओ कप्पो ॥ सेवं भंते ! सेवं भंते ॥
॥ दसमो उद्देशो समत्तो ||
॥ तइअं सतं समत्तं ||
चउत्थं सतं
पढमो, बीओ, तइओ, चउत्थो उद्देसो
चतारि विमाणेहिं, चत्तारि य होति रायहाणीहिं । णेरइए लेस्साहि य, दस उद्देसा चउत्थसये |
रायगिहे णयरे जाव एवं वयासी- ईसाणस्स णं भंते ! देविंदस्स देवरण्णो कई लोगपाला पण्णत्ता ?
गोयमा! चत्तारि लोगपाला पण्णत्ता, तं जहा- सोमे, जमे, वेसमणे, वरुणे ।
एएसि णं भंते ! लोगपालाणं कई विमाणा पण्णत्ता ?
गोयमा ! चत्तारि विमाणा पण्णत्ता, तं जहा- सुमणे, सव्वओभद्दे, वग्गू, सुवग्गू । कहि णं भंते! ईसाणस्स देविंदस्स देवरण्णो सोमस्स महारण्णो सुमणे णामं महाविमाणे पण्णत्ते ?
गोयमा ! जंबूद्दीवे दीवे मंदरस्स पव्वयस्स उत्तरे णं इमीसे रयणप्पभाए पुढवीए जाव ईसाणे णामं कप्पे पण्णत्ते, तत्थ णं जाव पंच वडेंसया पण्णत्ता, तं जहा- अंकवडेंसए, फलिहवडेंसए, रयणवडेंसए, जायरूववडेंसए, मज्झे ईसाण- वडेंसए । तस्स णं ईसाणवडेंसयस्स
