________________
समवायांग सूत्र उसभे णं अरहा कोसलिए चउरासीइं पुव्वसयसहस्साइं सव्वाउयं पालइत्ता सिद्धे जाव सव्वदुक्खप्पहीणे । एवं भरहो बाहुबली बंभी सुंदरी । सिज्जंसे णं अरहा चउरासीइं वाससयसहस्साइं सव्वाउयं पालइत्ता सिद्धे जाव सव्वदुक्खप्पहीणे। तिविढे णं वासुदेवे चउरासीइं वाससयसहस्साइं सव्वाउयं पालइत्ता अप्पइट्ठाणे णरए णेरइयत्ताए उववण्णे | सक्कस्स णं देविंदस्स देवरण्णो चउरासीई सामाणियसाहस्सीओ पण्णत्ताओ। सव्वे वि णं बाहिरया मंदरा चउरासीइं चउरासीइं जोयणसहस्साई उड्ढं उच्चत्तेणं पण्णत्ता | सव्वे वि णं अंजणगपव्वया चउरासीइं चउरासीइं जोयणसहस्साइं उड़ढं उच्चत्तेणं पण्णत्ता । हरिवास-रम्मयवासियाणं जीवाणं धणुपिट्ठा चउरासीइं जोयणसहस्साइं सोलस जोयणाइं चत्तारि य भागा (एगूणवीसइभाए) जोयणस्स परिक्खेवेणं पण्णत्ता । पंकबहुलस्स णं कण्डस्स उवरिल्लाओ चरमंताओ हेट्ठिल्ले चरमंते एस णं चउरासीइं जोयणसयसहस्साई अबाहाए अंतरे पण्णत्ते ।
विवाहपण्णत्तीए णं भगवईए चउरासीइं पयसहस्सा पयग्गेणं पण्णत्ता।
चोरासीइं णागकुमारावाससयसहस्सा पण्णत्ता | चोरासीइं पइण्णगसहस्साइं पण्णत्ता | चोरासीइं जोणिप्पमुहसयसहस्सा पण्णत्ता । पुव्वाइयाणं सीसपहेलियापज्जवसाणाणं सट्ठाण द्वाणंतराणं चोरासीए गुणकारे पण्णत्ते । उसभस्सणं अरहओ कोसलियस्स चउरासीइं गणा चउरासीइं गणहरा होत्था। उसभस्स णं अरहओ कोसलियस्स उसभसेणपामोक्खाओ चउरासीइं समणसाहस्सीओ होत्था । सव्वे वि य वेमाणियाणं चउरासीइं विमाणावाससयससहस्सा सत्ताणउइं सहस्सा तेवीसं च विमाणा भवंतीति मक्खायं |
पंचासीइइमो समवाओ
आयारस्स णं भगवओ सचूलियागस्स पंचासीइं उद्देसणकाला पण्णत्ता ।
धायइसंडस्स णं मंदरा पंचासीइं जोयणसहस्साई सव्वग्गेणं पण्णत्ता | रुयए णं मंडलियपव्वए पंचासीइं जोयणसहस्साई सव्वग्गेणं पण्णत्ते ।
णंदणवणस्स णं हेडिल्लाओ चरमंताओ सोगंधियस्स कंडस्स हेविल्ले चरमंते एस णं पंचासीइं जोयणसयाई अबाहाए अंतरे पण्णत्ते ।
