________________
समवायांग सूत्र
एगूणपण्णासइमो समवाओ सत्त-सत्तमियाए णं भिक्खुपडिमाए एगूणपण्णाए राइंदिएहिं छण्णउइ भिक्खासएणं अहासुत्तं अहाकप्पं अहामग्गं अहातच्चं सम्मं काएण फासित्ता पालित्ता सोहित्ता तीरित्ता किट्टित्ता आणाए अणुपालित्ता आराहिया भवइ । देवकुरु-उत्तरकुरुसु णं मणुया एगूणपण्णास-राइंदिएहिं संपण्ण जोव्वणा भवंति | तेइंदियाणं उक्कोसेणं एगूणपण्णं राइंदिया ठिई ।
पण्णासइमो समवाओ
१५ | मुणिसुव्वयस्स णं अरहओ पण्णासं अज्जियासाहस्सीओ होत्था । अणंते णं अरहा पण्णासं धणूई
उड्ढं उच्चत्तेणं होत्था । पुरिसुत्तमे णं वासुदेवे पण्णासं धणूई उड्ढं उच्चत्तेणं होत्था । सव्वे वि णं दीहवेयड्ढा मूले पण्णासं पण्णासं जोयणाणि विक्खंभेणं पण्णत्ता। लंतए कप्पे पण्णासं विमाणावाससहस्सा पण्णत्ता । सव्वाओ णं तिमिस्सगुहाखंडगप्पवायगुहाओ पण्णासं पण्णासं जोयणाई आयामेणं पण्णत्ता । सव्वे वि णं कंचणगपव्वया सिहरतले पण्णासं पण्णासं जोयणाई विक्खंभेणं पण्णत्ता।
एगपण्णासइमो समवाओ
णवण्हं बंभचेराणं एकावण्णं उद्देसणकाला पण्णत्ता ।
चमरस्स णं असुरिंदस्स असुरण्णो सभा सुहम्मा एकावण्णखंभसयसण्णिविट्ठा पण्णत्ता । एवं चेव बलिस्स वि ।
सुप्पभे णं बलदेवे एकावण्णं वाससयसहस्साई परमाउं पालइत्ता सिद्धे जाव सव्वदुक्खप्पहीणे |
दंसणावरण-णामाणं दोण्हं कम्माणं एकावण्णं उत्तरपगडीओ पण्णत्ताओ।
बावण्णइमो समवाओ
मोहणिज्जस्स णं कम्मस्स वावण्णं णामधेज्जा पण्णत्ता । तं जहा- कोहे कोवे रोसे दोसे अखमा संजलणे कलहे चंडिक्के भंडगे विवाए १०,
माणे मदे दप्पे थंभे अत्तुक्कोसे गव्वे परपरिवाए अवक्कोसे [परिभवे] उण्णए, उण्णामे २१ माया उवही णियडी वलए गहणे णूमे कक्के कुरुए दंभे ३, कूडे जिम्हे किव्विसे अणायरणया गृहणया वंचणया पलिकंचणया सातिजोगे ३८ ।
