________________
समवायांग सूत्र चउद्दसमो समवाओ
चउद्दस भूयग्गामा पण्णत्ता, तं जहा- सुहुमा अपज्जत्तया, सुहुमा पज्जत्तया, बादरा अपज्जत्तया, बादरा पज्जत्तया, बेइंदिया अपज्जत्तया, बेइंदिया पज्जत्तया, तेइंदिया अपज्जत्तया, तेइंदिया पज्जत्तया, चउरिंदिया अपज्जत्तया, चउरिंदिया पज्जत्तया, पंचिंदिया असण्णि अपज्जत्तया, पचिंदिया असण्णिपज्जत्तया, पंचिंदिया सण्णिअपज्जत्तया, पंचिंदिया सण्णिपज्जत्तया।
चउद्दस पुव्वा पण्णत्ता, तं जहाउप्पायपव्वमग्गेणियं च, तइयं च वीरियं पव्वं । अत्थीणत्थिपवायं, तत्तो णाणप्पवायं च ॥१॥ सच्चपवायं पुव्वं, तत्तो आयप्पवायपुव्वं च । कम्मप्पवायपुव्वं, पच्चक्खाणं भवे णवमं ॥२॥ विज्जाअणुप्पवायं, अबंझपाणाउ बारसं पव्वं । तत्तो किरियविसालं, पुव्वं तह बिंदुसारं च ॥३॥ अग्गेणिअस्स णं पुव्वस्स चउद्दस वत्थू पण्णत्ता | समणस्स णं भगवओ महावीरस्स चउद्दस समणसाहस्सीओ उक्कोसिया समणसंपया होत्था । कम्मविसोहिमग्गणं पडुच्च चउद्दस जीवट्ठाणा पण्णत्ता, तं जहा- मिच्छादिट्ठी, सासायण सम्मदिट्ठी, सम्मामिच्छदिट्ठी, अविरय सम्मदिट्ठी, विरयाविरए, पमत्तसंजए अप्पमत्तसंजए, णिअट्टिबायरे, अणिअट्टिबायरे, सुहुमसंपराए-उवसामए वा खवए वा, उवसंतमोहे, खीणमोहे, सजोगी केवली, अयोगी केवली । भरहेरवयाओ णं जीवाओ चउद्दस चउद्दस जोयणसहस्साइं चत्तारि य एगुत्तरे जोयणसए छच्च एगणवीसे भागे जोयणस्स आयामेणं पण्णत्ताओ ।
एग्गमेस्स णं रणो चाउरंतचक्कवट्टिस्स चउद्दस रयणा पण्णत्ता, तं जहा- इत्थीरयणे, सेणावइरयणे, गाहावइरयणे, पुरोहियरयणे, वड्ढइरयणे, आसरयणे, हत्थिरयणे, असिरयणे, दण्डरयणे, चक्करयणे, छत्तरयणे, चम्मरयणे, मणिरयणे, कागिणिरयणे ।
|
जंबुद्दीवे णं दीवे चउद्दस महाणईओ पुव्वावरेण लवणसमुई समति, तं जहा- गंगा, सिंधू, रोहिआ, रोहिअंसा, हरी, हरिकंता, सीआ, सीओदा, णरकंता, णारीकंता, सुवण्णकूला, रुप्पकूला, रत्ता, रत्तवई ।
