________________
ठाणांग सुत्तं
पभू णं विच्छुयजाइआसीविसे अद्धभरहप्पमाणमेत्तं बोदिं विसेणं विसपरिणयं विसट्टमाणिं करित्तए। विसए से विसद्वताए, णो चेव णं संपईए करेंसु वा करेइ वा करिस्संति वा । मंडुक्कजाइआसीविसस्स पुच्छा ? पभू णं मंडुक्कजाइआसीविसे भरहप्पमाण मेत्तं बोदिं विसेणं विसपरिणयं विसट्टमाणिं करित्तए | सेसं तं चेव जाव करिस्संति। उरगजाइ पुच्छा ? पभू णं उरगजाइआसीविसे जंबुद्दीवपमाणमेत्तं बोंदि । सेसं तं चेव जाव करिस्संति चेव । मणुस्सजाइ पुच्छा ? पभू णं मणुस्सजाइआसीविसे समयखेत्तपमाणमेत्तं बोंदि सेसं तं चेव जाव करिस्संति । चउव्विहे वाही पण्णत्ते, तं जहा- वाइए, पित्तिए, सिंभिए, सण्णिवाइए | चउव्विहा तिगिच्छा पण्णत्ता, तं जहा- विज्जो ओसहाई आउरे परियारए |
चत्तारि तिगिच्छगा पण्णत्ता, तं जहा- आयतिगिच्छए णाममेगे णो पर तगिच्छए, परतिगिच्छए णाममेगे णो आयतिगिच्छए, एगे आयतिगिच्छए वि परतिगिच्छए वि, एगे णो आयतिगिच्छए णो परतिगिच्छए ।
चत्तारि पुरिसजाया पण्णत्ता, तं जहा- वणकरे णाममेगे णो वणपरिमासी, वणपरिमासी णाममेगे णो वणकरे, एगे वणकरे वि वणपरिमासी वि, एगे णो वणकरे णो वणपरिमासी ।
चत्तारि पुरिसजाया पण्णत्ता, तं जहा- वणकरे णाममेगे णो वणसारक्खी, चउभंगो । चत्तारि पुरिसजाया पण्णत्ता, तं जहा- वणकरे णाममेगे णो वणसरोही, चउभंगो ।
१४
चत्तारि वणा पण्णत्ता, तं जहा- अंतोसल्ले णाममेगे णो बाहिंसल्ले, बाहिंसल्ले णाममेगे णो अंतोसल्ले, एगे अंतोसल्ले वि बाहिंसल्ले वि, एगे णो अंतोसल्ले णो बाहिंसल्ले । एवामेव चत्तारि पुरिसजाया पण्णत्ता, तं जहा- अंतोसल्ले णाममेगे णो बाहिंसल्ले, चउभंगो । चत्तारि वणा पण्णत्ता, तं जहा- अंतोदुढे णाममेगे णो बाहिंदुढे, चउभंगो । एवमेव चत्तारि पुरिसजाया पण्णत्ता, तं जहा- अंतोदुढे णाममेगे णो बाहिंदुढे, चउभंगो । चत्तारि पुरिसजाया पण्णत्ता, तं जहा- सेयंसे णाममेगे सेयंसे, सेयंसे णाममेगे पावंसे, पावंसे णाममेगे सेयंसे, पावंसे णाममेगे पावंसे ।
चत्तारि पुरिसजाया पण्णत्ता, तं जहा- सेयंसे णाममेगे सेयंसेत्ति सालिसए, सेयंसे णाममेगे पावंसेत्तिसालिसए। पावंसे णाममेगे सेयंसेत्ति सालिसए, पावंसे णाममेगे सेयंसेत्ति सालिसए।
चत्तारि पुरिसजाया पण्णत्ता, तं जहा- सेयंसे णाममेगे सेयंसेइ मण्णइ, सेयंसे णाममेगे पावंसेइ मण्णइ, चउभंगो ।
