________________
ठाणांग सुत्तं
इच्चेएहिं तिहिं ठाणेहिं अहणोववण्णे देवे देवलोएसु इच्छेज्ज माणुसं लोगं हव्वमागच्छित्तए, संचाएइ हव्वमागच्छित्तए । तओ ठाणाई देवे पीहेज्जा, तं जहा- माणुस्सगं भवं, आरिए खेत्ते जम्मं, सुकुलपच्चायाइं । तिहिं ठाणेहिं देवे परितप्पेज्जा, तं जहा- अहो ! णं मए संते बले, संते वीरिए, संते पुरिसक्कारपरक्कमे खेमंसि सुभिक्खंसि आयरियउवज्झाएहिं विज्ज- माणेहिं कल्लसरीरेणं णो बहुए सुए अहीए । अहो ! णं मए इहलोगपडिबद्धेणं परलोगपरंमुहेणं विसयतिसिएणं णो दीहे सामण्णपरियाए अणुपालिए | अहो ! णं मए इढि-रस-सायगरुएणं भोगासंसगिद्धेणं णो विसुद्धे चरित्ते फासिए | इच्चेएहिं तिहिं ठाणेहिं देवे परितप्पेज्जा ।
तिहिं ठाणेहिं देवे चइस्सामित्ति जाणइ, तं जहा- विमाणाभरणाइं णिप्पभाई पासित्ता, कप्परुक्खगं मिलायमाणं पासित्ता, अप्पणो तेयलेस्सं परिहायमाणिं जाणित्ता; इच्चेएहिं तिहिं ठाणेहिं देवे चइस्सामित्ति जाणइ । तिहिं ठाणेहिं देवे उव्वेगमागच्छेज्जा, तं जहाअहो ! णं मए इमाओ एयारूवाओ दिव्वाओ देविड्ढीओ दिव्वाओ देवजुईओ दिव्वाओ देवाणुभावाओ लद्धाओ पत्ताओ अभिसमण्णागयाओ चइयव्वं भविस्सइ। अहो ! णं मए माउओयं पिउसुक्कं तं तदुभयसंसहूं तप्पढमयाए आहारो आहारेयव्वो भविस्सइ। अहो ! णं मए कलमल-जंबालाए असुईए उव्वेयणियाए भीमाए गब्भवसहीए वसियव्वं भविस्सइ । इच्चेएहिं तिहिं ठाणेहिं देवे उव्वेगमागच्छेज्जा | तिसंठिया विमाणा पण्णत्ता, तं जहा- वट्टा, तंसा, चउरंसा | तत्थ णं जे ते वट्टा विमाणा, ते णं पुक्खरकण्णियासंठाणसंठिया सव्वओ समंता पागारपरिक्खित्ता एगदुवारा पण्णत्ता । तत्थ णं जे ते तंसा विमाणा, ते णं सिंघाडगसंठाणसंठिया दुहओपागार- परिक्खित्ता एगओ वेइयापरिक्खित्ता तिदवारा पण्णत्ता । तत्थ णं जे ते चउरंसा विमाणा, ते णं अक्खाडगसंठाणसंठिया सव्वओ समंता
वेड्यापरिक्खित्ता चउदुवारा पण्णत्ता | २६ | तिपइट्ठिया विमाणा पण्णत्ता, तं जहा- घणोदधिपइट्ठिया, घणवायपइडिया, ओवासंतरपइट्ठिया ।
तिविहा विमाणा पण्णत्ता, तं जहा- अवविया, वेउव्विया, पारिजाणिया ।
