Page Text
________________
६०
६१
६२
६३
६४
६५
६६
६७
६८
६९
ठाणांग सुत्तं
धायइसंडस्स णं दीवस्स वेइया दो गाउयाई उड्ढमुच्चत्तेणं पण्णत्ता ।
कालोदस्स णं समुद्दस्स वेइया दो गाउयाई उड्ढं उच्चत्तेणं पण्णत्ता ।
पुक्खरवरदीवड्ढपुरत्थिमद्धे णं मंदरस्स पव्वयस्स उत्तरदाहिणेणं दो वासा पण्णत्ता बहुसमतुल्ला जाव परिणाहेणं, तं जहा- भरहे चेव, एरवए चेव ।
तहेव जहा जंबुद्दीवे जाव दो कुराओ पण्णत्ताओ, तं जहा- देवकुरा चेव उत्तरकुरा चेव । तत्थ णं महइमहालया महद्दुमा पण्णत्ता, तं जहा- कूडसामली चेव, पउमरुक्खे चेव । देवा- गरुले चेव वेणुदेवे, पउमे चेव । सेसं तं चेव जाव छव्विहंपि कालं पच्चणुभवमाणा विहरंति ।
पुक्खरवरदीवड्ढपच्चत्थिमद्धे णं मंदरस्स पव्वयस्स उत्तरदाहिणेणं दो वासा पण्णत्ता । तहेव णाणत्तं-कूडसामली चेव, महापउमरुक्खे चेव । देवा- गरुले चेव वेणुदेवे, पुंडरीए चेव ।
पुक्खरवरदीवड्ढे णं दीवे दो भरहाई, दो एरवयाइं जाव दो मंदरा, दो मंदर चूलियाओ ।
पुक्खरवरस्स णं दीवस्स वेइया दो गाउयाई उड्ढमुच्चत्तेणं पण्णत्ता ।
सव्वेसिं पिणं दीवसमुद्दाणं वेइयाओ दो गाउयाई उड्ढमुच्चत्तेणं पण्णत्ताओ।
दो असुरकुमारिंदा पण्णत्ता, तं जहा- चमरे चेव, बली चेव । दो णागकुमारिंदा पण्णत्ता, तं जहा- धरणे चेव, भूयाणंदे चेव । दो सुवण्णकुमारिंदा पण्णत्ता, तं जहा- वेणुदेवे चेव, वेणुदाली चेव । दो विज्जुकुमारिंदा पण्णत्ता, तं जहा- हरिच्चेव, हरिस्सहे चेव । दो अग्गिकुमारिंदा पण्णत्ता, तं जहा- अग्गिसिहे चेव, अग्गिमाणवे चेव । दो दीवकुमारिंदा पण्णत्ता, तं जहा- पुण्णे चेव, विसिट्ठे चेव । दो उदहिकुमारिंदा पण्णत्ता, तं जहा- जलकंते चेव, जलप्पभे चेव । दो दिसाकुमारिंदा पण्णत्ता, तं जहा - अमियगति चेव, अमितवाहणे चेव । दो वायु- कुमारिंदा पण्णत्ता, तं जहा- वेलंबे चेव, पभंजणे चेव । दो थणियकुमारिंदा पण्णत्ता, तं जहा- घोसे चेव, महाघोसे चेव ।
दो पिसाइंदा पण्णत्ता, तं जहा- काले चेव, महाकाले चेव । दो भूइंदा पण्णत्ता तं जहा- सुरूवे चेव, पडिरूवे चेव । दो जक्खिंदा पण्णत्ता, तं जहा- पुण्णभद्दे चेव, माणिभद्दे चेव । दो रक्खसिंदा पण्णत्ता, तं जहा- भीमे चेव, महाभीमे चेव । दो किण्णरिंदा पण्णत्ता, तं जहाकिण्णरे चेव, किंपुरिसे चेव । दो किंपुरिसिंदा पण्णत्ता तं जहा- सप्पुरिसे चेव, महापुरिसे चेव । दो महोरगिंदा पण्णत्ता, तं जहा- अड्काए चेव, महाकाए चेव । दो गंधव्विंदा पण्णत्ता, तं जहा- गीयरती चेव, गीयजसे चेव ।
दो अणपणिंदा पण्णत्ता, तं जहा- सण्णिहिए चेव, सामण्णे चेव । दो पणपण्णिंदा पण्णत्ता, तं जहा - धाए चेव, विहाए चेव । दो इसिवाइंदा पण्णत्ता, तं जहा - इसिच्चेव इसिवालए चेव । दो भूतवाइंदा पण्णत्ता, तं जहा - इस्सरे चेव, महिस्सरे चेव । दो कंदिंदा पण्णत्ता, तं जहासुवच्छे चेव, विसाले चेव । दो महाकंदिंदा पण्णत्ता, तं जहा- हस्से चेव हस्सरई चेव ।
23
| SR No. | 009903 |
| Book Title | Agam 03 Ang 03 Sthanang Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 189 |
| Language | Prakrit |
| Classification | Book_Devnagari, Agam, Canon, & agam_sthanang |
| File Size | 4 MB |