Page Text
________________
ठाणांग सुत्तं
तत्थ णं दो महतिमहालया महादुमा पण्णत्ता-बहुसमतुल्ला जाव परिणाहेणं, तं जहाकूडसामली चेव, जंबू चेव सुदंसणा | तत्थ णं दो देवा महिड्ढिया महज्जुइया महाणुभागा महायसा महाबला महा- सोक्खा पलिओवमट्टिईया परिवसंति, तं जहा- गरुले चेव वेणुदेवे अणाढिए चेव जंबुद्दीवाहिवई । जंबुद्दीवे दीवे मंदरस्स पव्वयस्स उत्तरदाहिणेणं दो वासहरपव्वया पण्णत्ता- बहसमतुल्ला जाव परिणाहेणं, तं जहा- चुल्लहिमवंते चेव, सिहरिच्चेव । एवं महाहिमवंते चेव, रूप्पिच्चेव | एवं णिसढे चेव, णीलवंते चेव ।
जंबद्दीवे दीवे मंदरस्स पव्वयस्स उत्तरदाहिणेणं हेमवय-हेरण्णवएस् वासेसु दो वट्टवेयड्ढपव्वया पण्णत्ता बहुसमतुल्ला जाव परिणाहेणं, तं जहा- सद्दावाई चेव, वियडावाई चेव । तत्थ णं दो देवा महिड्ढिया जाव पलिओवमट्टिईया परिवसंति, तं जहा- साई चेव, पभासे चेव। जंबुद्दीवे दीवे मंदरस्स पव्वयस्स उत्तरदाहिणेणं हरिवास-रम्मएसु वासेसु दो वट्टवेयड्ढपव्वया पण्णत्ता- बहुसमतुल्ला जाव परिणाहेणं, तं जहा- गंधावाई चेव, मालवंतपरियाए चेव । तत्थ णं दो देवा महिइढिया जाव पलिओवमद्विईया परिवति, तं जहा- अरुणे चेव, पउमे
चेव।
जंबुद्दीवे दीवे मंदरस्स पव्वयस्स दाहिणेणं देवकुराए कुराए पुव्वावरे पासे, एत्थ णं आसक्खंधगसरिसा अद्धचंदसंठाणसंठिया दो वक्खारपव्वया पण्णत्ता बहुसमतुल्ला जाव परिणाहेणं, तं जहा- सोमणसे चेव, विज्जुप्पभे चेव । जंबुद्दीवे दीवे मंदरस्स पव्वयस्स उत्तरेणं उत्तरकुराए कुराए पुव्वावरे पासे, एत्थ णं आसक्खंधसरिसा अद्धचंद-संठाण-संठिया दो वक्खारपव्वया पण्णत्ता-बहुसमतुल्ला जाव परिणाहेणं, तं जहा- गंधमायणे चेव, मालवंते चेव । जंबुद्दीवे दीवे मंदरस्स पव्वयस्स उत्तरदाहिणेणं दो दीहवेयड्ढपव्वया पण्णत्ता- बहुसमतुल्ला जाव परिणाहेणं, तं जहा- भारहे चेव दीहवेयड्ढे, एरवए चेव दीहवेयड्ढे | भारहएणं दीहवेयड्ढे दो गुहाओ पण्णत्ताओ बहसमतुल्लाओ जाव परिणाहेणं, तं जहातिमिसगुहा चेव, खंडगप्पवायगुहा चेव । तत्थ णं दो देवा महिइढिया जाव पलिओवमद्विईया परिवसंति, तं जहा- कयमालए चेव, णट्टमालए चेव । एवं एरवएणं दीहवेयड्ढे तं चेव भाणियव्वं जाव णट्टमालए चेव । जंबुद्दीवे दीवे मंदरस्स पव्वयस्स दाहिणे णं चुल्लहिमवंते वासहरपव्वए दो कूडा पण्णत्ता बहुसमतुल्ला जाव परिणाहेणं, तं जहा- चुल्लहिमवंतकूडे चेव, वेसमणकूडे चेव । जंबुद्दीवे दीवे मंदरस्स पव्वयस्स दाहिणे णं महाहिमवंते वासहरपव्वए दो कूडा पण्णत्ता- बहुसमतुल्ला जाव परिणाहेणं, तं जहा- महाहिमवंतकूडे चेव, वेरुलियकूडे चेव ।
17
| SR No. | 009903 |
| Book Title | Agam 03 Ang 03 Sthanang Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 189 |
| Language | Prakrit |
| Classification | Book_Devnagari, Agam, Canon, & agam_sthanang |
| File Size | 4 MB |