________________
७
८
९
१०
११
१२
१३
१४
१५
ठाणांग सुत्तं
आपुच्छियचारी यावि भवइ, णो अणापुच्छियचारी । आयरिय-उवज्झाए णं गणंसि अणुप्पण्णाइं उवगरणाई सम्मं उप्पाइत्ता भवइ । आयरिय उवज्झाए णं गणंसि पुव्वुप्पणाइं उवकरणाइं सम्मं सारक्खेत्ता संगवित्ता भवइ, णो असम्मं सारक्खेत्ता संगवित्ता भवइ । आयरिय-उवज्झायस्स णं गणंसि सत्त असंगहठाणा पण्णत्ता, तं जहा- आयरिय-उवज्झाए णं गणंसि आणं वा धारणं वा णो सम्मं परंजित्ता भवइ । आयरिय उवज्झाए णं गणंसि आहाराइणियाए किइकम्मं णो सम्मं परंजित्ता भवइ । आयरिय-उवज्झाए णं गणंसि जे सुत्तपज्जवजाए धारेइ ते काले-काले णो सम्म- मणुप्पवाइत्ता भवइ । आयरिय-उवज्झाए णं गणंसि गिलाणसेहवेयावच्चं णो सम्म -मब्भुट्ठित्ताभवइ । आयरिय- उवज्झाए णं गणंसि अणापुच्छियचारि यावि हवइ, णो आपुच्छियचारी । आयरिय उवज्झाए णं गणंसि अणुप्पण्णाई उवगरणाइं णो सम्मं उप्पाइत्ता भवइ । आयरिय उवज्झाए णं गणंसि पच्चुप्पण्णाणं उवगरणाणं णो सम्मं सारक्खेत्ता संगोवेत्ता भवइ ।
सत्त पिंडेसणाओ पण्णत्ताओ । सत्त पाणेसणाओ पण्णत्ताओ । सत्त उग्गह- पडिमाओ पण्णत्ताओ ।
सत्त सत्तिक्कया पण्णत्ता ।
सत्त महज्झयणा पण्णत्ता ।
सत्त-सत्तमिया णं भिक्खुपडिमा एगुणपण्णाए राइदिएहिं एगेण य छण्णउएणं भिक्खासएणं अहासुत्तं अहाकप्पं अहातच्चं अहामग्गं सम्मं काएणं फासिया पालिया सोहिया तीरिया किट्टिया आराहिया यावि भवइ ।
अहेलोगे णं सत्त पुढवीओ पण्णत्ताओ । सत्त घणोदहीओ पण्णत्ताओ । सत्त घणवाया पण्णत्ता। सत्त तणुवाया पण्णत्ता । सत्त ओवासंतरा पण्णत्ता ।
एएस णं सत्तसु ओवासंतरेसु सत्त तणुवाया पइट्ठिया । एएसु णं सत्तसु तणुवासु सत्त घणवाया पइट्ठिया । एएसु णं सत्तसु घणवाएसु सत्त घणोदही पइट्ठिया । एएस णं सत्तसु घणोदहीसु पिंडलग-पिहुल- संठाण - संठियाओ सत्त पुढवीओ पण्णत्ताओ, तं जहा- पढमा जाव
सत्तमा ।
एयासि णं सत्तण्ह पुढवीणं सत्त णामधेज्जा पण्णत्ता, तं जहा- घम्मा, वंसा, सेला, अंजणा, रिट्ठा, मघा, माघवई।
एयासि णं सत्तण्हं पुढवीणं सत्त गोत्ता पण्णत्ता, तं जहा- रयणप्पभा, सक्करप्पभा, वालुयप्पभा, पंकप्पभा, धूमप्पभा, तमा, तमतमा ।
सत्तविहा बायरवाउकाइया पण्णत्ता, तं जहा- पाईणवाए, पडीणवाए, दाहिणवाए, उदीणवाए, उड्ढवाए, अहेवाए, विदिसिवाए ।
132
