Page Text
________________
५२
सुयगडांग सूत्र - बीओ सुयखंधो जे खलु गारत्था सारंभा सपरिग्गहा, संतेगइया समण-माहणा सारंभा सपरिग्गहा, दुहओ पावाई इति संखाए दोहिं वि अंतेहिं अदिस्समाणे इति भिक्खू रीएज्जा | से बेमि- पाईणं वा पडीणं वा उदीणं वा दाहिणं वा एवं से परिण्णायकम्मे, एवं से विवेगकम्मे, एवं से वियंतकारए भवतीति मक्खायं ।
तत्थ खल भगवया छज्जीवणिकाय हेऊ पण्णत्ता, तं जहा- पढविकाइया जाव तसकाइया । से जहाणामए मम अस्सायं दंडेण वा अट्ठीण वा मुट्ठीण वा लेलुणा वा कवालेणं वा आउट्टिज्जमाणस्स वा हम्ममाणस्स वा तज्जिज्जमाणस्स वा ताडिज्जमाणस्स वा परिताविज्जमाणस्स वा किलामिज्जमाणस्स वा उद्दविज्ज-माणस्स वा जाव लोमुक्खणणमायमवि हिंसाकरं दुक्खं भयं पडिसंवेदेमि, इच्चेवं जाण सव्वे पाणा जाव सत्ता दंडेण वा जाव कवालेण वा आउट्टिज्जमाणा वा हम्ममाणा वा तज्जिज्जमाणा वा ताडिज्जमाणा वा परियाविज्जमाणा वा किलामिज्जमाणा वा उद्दविज्जमाणा वा जाव लोमुक्खणणमायमवि हिंसाकरं दुक्खं भयं पडिसंवेदेति। एवं णच्चा सव्वे पाणा जाव सव्वे सत्ता ण हंतव्वा, ण अज्जावेयव्वा, ण परिघेत्तव्वा, ण परियावेयव्वा, ण उद्दवेयव्वा । से बेमि- जे य अईया जे य पडुपण्णा जे य आगमेस्सा अरहंता भगवंतो सव्वे ते एवमाइक्खंति, एवं भासेंति, एवं पण्णवेंति, एवं परुति-सव्वे पाणा जाव सव्वे सत्ता ण हंतव्वा, ण अज्झावेयव्वा, ण परिघेतव्वा, ण परियावेयव्वा, ण उद्दवेयव्वा, एस धम्मे धुवे णिइए सासए, समेच्च लोगं खेयण्णेहिं पवेइए । एवं से भिक्खू विरए पाणाइवायाओ जाव विरए परिग्गहाओ । णो दंतपक्खालणेणं दंते पक्खालेज्जा, णो अंजणं, णो वमणं, णो धूमं णो धूमणेत्तं पि आविए |
६
से भिक्खू अकिरिए अलूसए अकोहे अमाणे अमाए अलोभे उवसंते परिणिव्वुडे। णो आसंसं पुरओ करेज्जा- इमेण मे दिटेण वा सुएण वा मुएण वा विण्णाएण वा इमेण वा सुचरिय तवणियम-बंभचेरवासेणं इमेण वा जायामायावृत्तिएणं धम्मेणं इओ चुए पेच्चा देवे सिया कामभोगाण वसवत्ती, सिद्धे वा अदुक्खमसुभे, एत्थ वि सिया, एत्थ वि णो सिया । से भिक्खू सद्देहिं अमुच्छिए, रूवेहिं अमुच्छिए, गंधेहिं अमुच्छिए, रसेहिं अमुच्छिए, फासेहिं अमुच्छिए, विरए कोहाओ माणाओ मायाओ लोभाओ पेज्जाओ दोसाओ कलहाओ अब्भक्खाणाओ पेसुण्णाओ परपरिवायाओ अरइरईओ मायामोसाओ मिच्छादसणसल्लाओ, इति से महया आयाणाओ उवसंते उवट्ठिए पडिविरए । से भिक्खू जे इमे तस-थावरा पाणा भवंति ते णो सयं समारंभइ, णेव अण्णेहिं समारंभावेइ,
अण्णे समारभंते वि ण समणुजाणइ, इति से महया आयाणाओ उवसंते उवट्ठिए पडिविरए | १९ / से भिक्खू जे इमे कामभोगा सचित्ता वा अचित्ता वा ते णो सयं परिगिण्हइ, णेव अण्णेण
परिगिण्हावेइ, अण्णं परिगिण्हतं पि ण समाजाणइ, इति से महया आयाणाओ उवसंते उवट्ठिए पडिविरए ।
| SR No. | 009902 |
| Book Title | Agam 02 Ang 02 Sutrakrutang Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 105 |
| Language | Prakrit |
| Classification | Book_Devnagari, Agam, Canon, & agam_sutrakritang |
| File Size | 4 MB |