________________
आचारांग सूत्र - बीओ सुयखंधो
अहावरा दोच्चा पडिमा- जस्स णं भिक्खुस्स एवं भवइ अहं च खलु अण्णेसिं भिक्खूणं अट्ठाए ओग्गहं ओगिहिस्सामि, अण्णेसिं भिक्खूणं उग्गहे ओग्गहिए उवल्लिस्सामि । दोच्चा पडिमा | अहावरा तच्चा पडिमा- जस्स णं भिक्खुस्स एवं भवइ- अहं च खलु अण्णेसिं भिक्खुणं अट्ठाए ओग्गहं ओगिहिस्सामि, अण्णेसिं भिक्खूणं च ओग्गहे ओग्गहिए णो उवल्लिस्सामि । तच्चा पडिमा | अहावरा चउत्था पडिमा- जस्स णं भिक्खुस्स एवं भवइ- अहं च खलु अण्णेसिं भिक्खुणं अट्ठाए ओग्गहं णो ओगिहिस्सामि, अण्णेसिं च ओग्गहे उग्गहिए उवल्लिस्सामि | चउत्था पडिमा । अहावरा पंचमा पडिमा- जस्स णं भिक्खुस्स एवं भवइ अहं च खलु अप्पणो अट्ठाए ओग्गहं ओगिहिस्सामि, णो दोण्हं, णो तिण्हं, णो चउण्हं, णो पंचण्हं | पंचमा पडिमा । अहावरा छट्ठा पडिमा- से भिक्खू वा भिक्खुणी वा जस्सेव ओग्गहे उवल्लिएज्जा, जे तत्थ अहासमण्णागए तं जहा- इक्कडे वा जाव पलाले वा, तस्स लाभे संवसेज्जा, तस्स अलाभे उक्कुडुए वा णेसज्जिए वा विहरेज्जा | छट्ठा पडिमा। अहावरा सत्तमा पडिमा- से भिक्खू वा भिक्खुणी वा अहासंथडमेव ओग्गहं जाएज्जा, तं जहापुढविसिलं वा कट्ठसिलं वा अहासंथडमेव तस्स लाभे संवसेज्जा, तस्स अलाभे उक्कुडुओ वा णेसज्जिओ वा विहरेज्जा | सत्तमा पडिमा ।
इच्चेयासिं सत्तण्हं पडिमाणं अण्णयरं जहा पिंडेसणाए । १५ | सुयं मे आउसं तेणं भगवया एवमक्खायं- इह खलु थेरेहिं भगवंतेहिं पंचविहे ओग्गहे पण्णत्ते, तं
जहा- देविंदोग्गहे, रायोग्गहे, गाहावइओग्गहे, सागारियओग्गहे, साहम्मियओग्गहे । १६ एयं खलु तस्स भिक्खुस्स वा भिक्खुणीए वा सामग्गियं । जं सव्वदेहिं समिए सहिए सया
जएज्जासि। त्ति बेमि ।
|| बीओ उद्देसो समत्तो ||
॥ सत्तमं अज्झयणं समत्तं॥
अहमं अज्झयणं
ढाण-सत्तिक्कयं १ से भिक्खू वा भिक्खुणी वा अभिकंखेज्जा ठाणं ठाइत्तए | से अणुपविसेज्जा गाम वा णगरं वा जाव
रायहाणिं वा । से अणुपविसित्ता गाम वा जाव रायहाणिं वा से जं पुण ठाणं जाणेज्जा सअंडं जाव मक्कडासंताणयं, तं तहप्पगारं ठाणं अफासुयं अणेसणिज्जं लाभे संते णो पडिगाहेज्जा । एवं
सेज्जागमेण णेयव्वं जाव उदगपसूयाइं ति | २ इच्चेयाइं आयतणाइं उवाइकम्म अह भिक्खू इच्छेज्जा चउहिं पडिमाहिं ठाणं ठाइत्तए |
